“Ukushipikisha E ko Mukabila”

NGA tuli no kupokelela “icalaiwa,” ‘ukushipikisha e ko tukabila.’ (AbaHebere 10:36, NW) Uwasoma ifya Baibolo umo alondololo kuti ishiwi lya ciGriki ilya “kushipikisha” ilyo umutumwa Paulo abomfeshe muli ili lembo inshita shimo libomba ku kulondolola “amaka ya cimenwa ukutwalilila icituntulu mu mibele yayafya ne fyashingulukako ifishayana.”

Mu mpili sha ku Bulaya, mulamena icimenwa ca musango fye uyo wine. Pa kuba ica kusungusha sana, bacinika abati ikala kuli pe na pe. Ici cimenwa ca mu mpili sha alps, kwena, tacikala kuli pe na pe, lelo cilekale myake ingi, ukubalula amaluba yayembesha ulusuba ululi lonse. The New Encyclopædia Britannica ilondololo kuti ishina lya kuti ikala kuli pe na pe lyapeelwe kuli ici cimenwa pa mulandu wa “kucimfye miceele yabipa no kukokola.” (Ishina lya sayansi ilya ifi fimenwa ifya mutundu wa Sempervivum nalyo lyalola mu kuti “ikala kuli pe na pe.”)

Icilenga ici cimenwa cakosa ukube caibela mulandu wa kuti cikula mu ncende shaumba sana. Kuti casangwa pa muulu mu mikunkuluko ya mpili umupyangililwa ku mwela, umo ukutalala kwingaya pa nshi ukwisafika ku madigiri celsius 35 mu maawala fye 24. Kuti calimbuka umwalepuka mu mabwe ne loba ilyacepesha. Ni nkama nshi shimo ishilenga cene ukushipikisha mu mibele yakalabana iya musango yo?

Uyu ikala kuli pe na pe aba na mabula ayekata amenshi, ayo yabakilila amenshi. Ici cicilenga ukushukila umutonshi uuli onse uwingasangwa ku mfula nelyo ku mfula yabuuta iisunguluka. Ukulundapo, cimena mu fisansangu no kukumbinkanya ubukose bwa fiko pa kwikatilila ku ca kutungilila icaba mwi bwe. Pa kulimbuka mu mabwe umwalepuka, cilacingililwa ku filetwako ne miceele, nangu line kuti pali fye iloba linono. Mu mashiwi yambi, cilatemfuma pa kushukila fye ifyo fine fili mu mibele yayafya.

Ukulandila mu mano ya ku mupashi, kuti pambi twaisanga mu mibele iyesha umusango wa kushipikisha kwesu. Cinshi cikatwaafwa ukushipikisha ilyo tuli mu fya kwesha? Ukupala icimenwa ca ikala kuli pe na pe, kuti twatutila amenshi yapeelo bumi aya Cebo ca kwa Lesa no kubishanya mu kupalamisha na Bena Kristu ba cine ku kutungililwa no kucingililwa. Pali fyonse, ukupala lilye luba lya mu mpili sha alps, tufwile ukulambatila mu kukosa ku “cilibwe” cesu, Yehova, pamo na ku Cebo cakwe na ku kuteyanya kwakwe.—2 Samwele 22:3.

Mu cine cine, icimenwa ca ikala kuli pe na pe caba ca kucinkulako ca maka ica kuti, nangu fye ni mu mibele yakalabana, kuti twashipikisha nga twashukila ukupayanya uko twakwata. Yehova alatwebekesha ukuti ukushipikisha kwa musango yo kukatutungulula ku ‘kupyaninine filayo,’ ico mu mano ya cine cine cikapilibula ukwikala kuli pe na pe.—AbaHebere 6:12; Mateo 25:46.