Umutelelwe wa Cine—Ubuyo Ubupusumuka
ARNOLD aali mwana uwatemenwe icilubi cakwe icabililwe mu musango wa tiger icashindailwamo tonge. Konse fye kuntu aaleya, ninshi alecikululula—pa kwangala, pa kulya, pa kuya ku kusendama. Kuli wene, tiger alemupeela icisansamushi, umutelelwe. Kasuba kamo, calyafishe. Uyu tiger alilubile!
Ilyo Arnold alelila, nyina, wishi, na bandume nankwe bakalamba batatu ninshi balesokota mu ŋanda yabo ikalamba pa kuti basange uyo tiger. Umo pali bene asukile amusanga mu drowa. Cilemoneka kwati, Arnold e wabikilemo kabili mu kwangufyanya alaba apo abikile. Balimubweseeshe uyu tiger, kabili Arnold alikumwine filamba. Ayumfwile uwa nsansa no mutelelwe na kabili.
Fintu cingawamisha amafya yonse nga yengalapikululwa muli yo nshila yaanguka—kwati fye kusanga icilubi ca tiger mu drowa! Ku cinabwingi ca bantu, nangu cibe fyo, amafya ya mutelelwe yalikakala nga nshi kabili yalipikana ukucilanapo. Mupepi fye no kuli konse, abantu balalanguluka abati, ‘Bushe nkakumanya imisoka nelyo ulukaakala? Bushe ndi mu busanso bwa kulufye ncito? Bushe ulupwa lwandi nalucetekelo kuti bali no kukwate ca kulya cakumanina? Bushe abantu bali no kulansengauka pa mulandu wa mipepele yandi nelyo pa mulandu wa cikulilo ca mutundu wandi?’
Impendwa ya bantu abashaba na mutelelwe yaba ikalamba nga nshi. Ukulingana na United Nations, mupepi na mabilioni yatatu tababa ne nshila iya kusangilamo te kundapwa fye ku malwele ya fye fye lelo na kabili tabengasanga imiti ine ine. Abantu ukucila pali bilioni umo balacululuka mu bupiina bwabipisha. Abantu mupepi na bilioni umo, nangu cingatila balabomba, tababombe ncito ine ine ukufishapo. Impendwa ya mbutushi ileingilishiwako. Ukufika pa mpela ya 1994, mu bantu aba pe sonde abali bonse 115, umo ali napatikishiwa ukufulumuka mu calo cabo. Amamilioni ya myeo ilonaulwa pamo nge ca kufuma mu bukwebo bwa miti ikunkumya ubufumya amadola amabilioni 500 pa mwaka, ubukwebo ubufyalulula incitilo sha misoka no lukaakala ishishaifulila. Inkondo ipumpunta imyeo ya mamilioni. Mu 1993 mweka, ifyalo 42 fyali mu kushenkana kukalamba, ilintu fimbi 37 fyapitile mu lukaakala lwa bupolitiki.
Inkondo, ubupiina, imisoka, na fimbi ifitiinya umutelelwe wa bantunse fyalyampana, kabili impendwa ya fiko ilekula. Ku mafya ya musango yo takwabako ukupikulula ukwayanguka. Na kuba, abantunse tabakatale abayapikulula nakalya.
“Mwitetekela bakankaala, nangu mwana wa muntu uo takuli ukupususha muli wene,” e fisoka Icebo ca kwa Lesa, Baibolo. Nani, kanshi, twingatetekela? Ili lembo lyatwalilila aliti: “Alishuka uo Lesa wa kwa Yakobo e kwafwa kwakwe, uo icilolelo cakwe cili kuli Yehova Lesa wakwe, uwacitile umuulu na pano isonde, bemba, na fyonse ifilimo.”—Ilumbo 146:3-6.
Mulandu nshi twingatetekelela muli Yehova ku kuleta umutelelwe kuli lino isonde? Bushe kuti cacitika ukuipakisha ubumi bwacingililwa, ubwa nsansa nomba? Ni shani fintu Lesa akafumyapo ifyacilikila umutelelwe wa buntunse?