Abombeele Yehova mu Kuicefya
“TE MULANDU na kuntu ulebombela lelo untu ulebombela mu cituntulu e cakatama.” John Booth e watemenwe ukulanda ayo mashiwi, kabili ifyo fine e fyo alekonka. Ubumi bwakwe pe sonde, ubwapwile pali Cimo, January 8, 1996, bwalangilile mu kushininkisha untu asalile ukubombela.
Ilyo aali umulumendo ku numa mu 1921, John Booth alesapike mifwaile mu bumi. Alesambilisha Sande sukulu mu calici ca Dutch Reformed, lelo alecincintila itontonkanyo lya kukanshiwa ku kuti abe minista wa fya mipepele, aleyumfwe fyo ubumi bwa bashimapepo bwali bwa bukaitemwe. Lintu amwene trakiti uwalesabankanya ilyashi lya kuti “Amamilioni Abali aba Mweo Nomba Tabakatale Abafwa,” ilyo line fye aipwishe ukutuminwa ifitabo fyasabankanishiwe. Pa kucebushiwa na cintu abelengele, papitile fye nshita inono atendeke ukucofa incinga amakilomita 24 ukuya ku kulongana kwa Basambi ba Baibolo, nga fintu Inte sha kwa Yehova shaishibikwe lilya. Abatishiwe mu 1923 no kutendeka ukushimikila ku ŋanda ne ŋanda mu citungu ca Wallkill, New York, uko ulupwa lwakwe lwakwete farmu wa ŋombe sha mukaka.
Munyina Booth aingile mu butumikishi bwa nshita yonse mu April 1928. Ashimikile mu cifulo ca ku mwabo na ku mishi ya ku Kapinda ka Kulyo, ukukaabushanya impapulo sha Baibolo ne fya kulya no mwa kusendama. Alelolenkana na masanso pamo ilyo abene mayanda abalekumba amaalwa pa myabo balefuma ne mfuti, umo uwa bene alipikile painiya munankwe uwa kwa John Booth no kumucena. Mu 1935, Munyina Booth alisontelwe ukuba kangalila wenda kabili atendeke ukutandalila ifilonganino na mabumba yanono ukushinguluka incende ya mu mushi. Ateyenye amabungano no kwaafwa bamunyina na bankashi ukushipikisha te mulandu no kukaanya. Libili libili Munyina Booth alelolenkana na mabumba yakalipa, ukuyalubulula mu filye, no kubikwa mu fifungo. “Pa kulondolola tonse utwacitike muli shilya nshita sha kucincimusha kuti cafwaya icitabo,” e fintu alembele inshita imo.
Mu 1941, Joseph F. Rutherford, uwali pali iyo nshita presidenti wa Watch Tower Society, apeele Munyina Booth umulimo ku Kingdom Farm, mupepi na Ithaca, New York. Kulya e ko abombele mu busumino pa myaka 28. Pa kuba no kutemwa kushashibantukila ukwa butumikishi, aipakishe ukubishanya na makana ya basambi be sukulu lya kukansha bamishonari ilya Watchtower Bible School of Gilead, ilyabelele pa Kingdom Farm ukufikila 1961. Mu 1970, Munyina Booth alombelwe ukuyabombela ku Watchtower Farms mu Wallkill, New York, na muli fyo abwelele mu ncende imo ine umo atendekele bupainiya imyaka 45 mu kubangilila.
Mu 1974, Munyina Booth alisontelwe ukuba icilundwa ce Bumba Litungulula ilya Nte sha kwa Yehova mu Brooklyn, New York. Abombele mu busumino muli ulo lubali ukufikila imfwa yakwe pa mushinku wa myaka 93. John Booth alitemwikwe pa mulandu wa buntu bwakwe ubwa Bwina Kristu ubwaicefya kabili ubwa cikuuku. Acili aleshimikila mu busumino ku ŋanda ne ŋanda na mu misebo ya mu musumba ukufikila ubutuntulu bwakwe na maka fyabongolweke.
Ilintu abo abalebomba nankwe baleloosha pa kuti natusha, balasanga icisansamushi mu bulayo bwa Baibolo ukukuma ku Bena Kristu basubwa aba musango yo, ubwa kuti babuushiwa ukuya ku bumi bwa ku muulu no kuti “imilimo yabo ilebakonka.” (Ukusokolola 14:13; 1 Abena Korinti 15:51-54) Ubwikashi bupya mu cine cine, lelo muli ubo John Booth akabombela Yehova kuli pe na pe!
[Icikope pe bula 32]
John Booth 1903-1996
[Icikope pe bula 32]
HERALD-AMERICAN, ANDOVER 1234
76 Jehovites Jailed in Joliet
[Abatusuminishe]
Chicago Herald-American