Uwali Kapingula Alombo Kweleelwa—Pa Numa ya Myaka 45
MU CILYE ca mu Berlin, mu August 1995, uwali kapingula mu Cilye Casumbukisha alondolwele kuli umo uwa Nte sha kwa Yehova ukubipilwa kwakwe pa cilubo acitile imyaka 45 iyapitapo.
Mu October 1950, Icilye Casumbukisha ica German Democratic Republic (GDR) cabilishe Inte sha kwa Yehova 9 ukuti bali no mulandu wa kutenkanye calo no wa kuba inengu. Babili bakakilwe mpaka ne mfwa, e lyo bambi 7—ukusanshako na Lothar Hörnig wa myaka ya bukulu 22, shimilandu walenga bane ukufuma ku kulyo muli ici cikope—bakakilwe imyaka iingi.
Imyaka 40 pa numa, GDR asangwike ulubali lwa Federal Republic of Germany. Abalashi ukutule lyo balifwailisha ulufyengo lumo lumo ulwacitilwe mu cali kale GDR kabili balyesha ukulubulwisha bonse abashingemwe no lo lufyengo. Ulufyengo lumo ulwa musango yo lwali kulubulwisha uko Icilye Casumbukisha calubulwishe Inte mu 1950.
A. T., nomba uuli ne myaka 80, aali umo muli bakapingula batatu abapingwile umulandu lintu Inte 9 shalubulwishiwe. Nomba pa kupeelwa umulandu wa kunyonganya ubupingushi, amonekele mu Cilye ca Citungu mu Berlin ku kulondolola ubupingushi bwakwe.
Mu kulondolola kwakwe ku cilye, uyu wali kapingula alisumine ukuti imyaka 45 iyafumineko awilile ku kuti aba bantu babape umulandu, nangu line afwaile ukuti ubupingushi bwiba ubwatapata sana. Lelo umulandu walelubululwa nomba line wamulengele ukutontonkanyapo na kabili. Mulandu nshi? Inte sha kwa Yehova shalipakeswe ku baNazi mu nkondo ya calo iya cibili pantu balikeene ukwafwilisha Hitler. Pa numa ya nkondo Inte na kabili shalipakeswe, ili lyena ku buteko bwa ciKomyunizimu. Ici calengele kapingula “ukulungulushiwa apakalamba.”
Lothar Hörnig aebele icilye ukuti apoosele imyaka isano na hafu mu cifungo ca kubikwa eka kabili takakwilwe ukufuma mu cifungo ca ku Brandenburg mpaka mu 1959. Pa kumfwa ukulanda kwa kwa Hörnig, uyu wali kapingula atendeke ukulukushe filamba. “Ndi no bulanda nga nshi,” e fyo ashinshimukiile. “Napaapaata njeleleniko.” Hörnig alipokelele uko kulombo kweleelwa.—Linganyeniko Luka 23:34.
[Abatusuminishe Ukubomfya Icikope pe bula 32]
Neue Berliner Illustrierte