“Bushe Ndeloota Nelyo Iyo?”
Lipoti wakonkapo afuma ku Malawi ukukuma kuli limo ilya Mabungano ya Citungu aya “Bakalumbanya ba Buseko” aya Nte sha kwa Yehova ayacitilwe kulya mu lusuba lwa 1995.
“MU MUSEBO ukalamba, pa kati fye ukufuma ku lulamba lwa ku masamba ulwa bemba wa Malawi, palipo icishibilo icaimikwe pa muku wa kubalilapo mu myaka 29. Cilebelengwa ukuti, ‘Ibungano lya Citungu Ilya Nte sha kwa Yehova.’
“Icimbayambaya cikalamba nacimikwa lwa mupepi ne cishibilo, kabili muli cene mwafuma amakombe ukucila 200 ukufuma kwi tauni lya Mzuzu. Nabaleta imitumba ya fya kufwala, amalangeti, imipika, imbeketi, ifya kulya, inkuni, na baBaibolo ku kuilunda kuli bamunyinabo ne nkashi mupepi na 3,000 ukufuma mu fifulo fimbi.
“Ilyo tuleposha bamunyina balefuma mu cimbayambaya, George Chikako, uwa myaka 63, afika, alekunkulusha incinga yakwe mu mucanga, pa kuba nacofa pa nshiku shibili ukufuma ku Nkhotakota. Ku numa uku, Munyina Chikako akakilwe imyaka ine mu cifungo pa mulandu wa kukaana ukutoba ifishinte fya Baibolo. Indume nankwe muli bawishi bambi alifwile ku mpumo apuminwe ilyo afungilwe. ‘Bushe ndeloota nelyo iyo?’ e fyaipusha Munyina Chikako. ‘Ili ibungano lilecitwa mu kasuba katande mono, kabili aba bantu baleimba inyimbo sha Bufumu mu kupongomoka! Pa myaka iingi, twalelongana ubushiku, ukulaimba inyimbo sha Bufumu mu kantepentepe, no kufikina fye mu maboko pa kutoota. Nomba tulelonganina pa lwalaala, kabili abantu nabasunguka ukumona ukuti twalifula nga nshi pantu batontonkenye ifyo twali fye abanono!’
“Icifulo ce bungano cakwata ulusasa lwafimbwapo ifiseesa ku kupayanya icintelelwe. Ifipaka fya fyani no mwa kusendama fyalikuulilwe ku kusungilamo amakombe. Umwela wa cungulo waisulamo ifiunda fya mashiwi yashaiwamina ayashili ayakashiminishi na kabili pa mulandu wa kutiina ukupakaswa.
“Fintu cili icalingisha ukuti ibungano likwete umutwe wa liko ‘Bakalumbanya ba Buseko’!”
[Abatusuminishe]
Mountain High Maps® Copyright © 1995 Digital Wisdom, Inc.