“Bonse Twaba aba Lupwa fye Lumo Lwine”

MU MYAKA ya nomba line impatila sha fya mipepele na kapaatulula ka mishobo nafyanana ukushinguluke sonde. Ukupusana kwa mikowa kwalibalamuna ukwipayana, ukulungulusha, no bukalushi bumbi ubwa kulenge nsoni. Ukulingana no kushimika kwa Amnesty International, ukusuula insambu sha bantunse kwapatikishe abantu ukucila pa mamilioni 23 mu kusaalala kwa calo ukufulumuka mu mayanda yabo mu 1994.

Mu Rwanda fye mweka, mupepi na bantu 500,000 balipaiwe kabili ukucila pali bambi 2,000,000 basangwike imbutushi lintu ulukaakala lwapuulike pa kati ka baTutsi na baHutu. Inyunshipepala ya ku Belgium Le Soir, yashimike ukuti: “Inte sha kwa Yehova ukucilisha balipakeswe pa mulandu wa kuti bakeene ukwimye fyanso.” Inte sha kwa Yehova tashiyobeka mu kukangana kwa fyanso. Nangu ni fyo, imyanda pa kati kabo balipaiwe mu lukaakala. Ici citwibukishako ulwa mashiwi ya kwa Yesu ku basambi bakwe aya kuti: “Ico tamuli ba pano isonde, . . . e co aba pano isonde bamupatila.”—Yohane 15:19.

Ulupwa lumo ulwa Nte—Eugène Ntabana, umukashi wakwe, na bana babili—baleikala mu musumba ukalamba, Kigali. Pa kulondolwela abena mupalamano bakwe ukukanaibimbamo mu milandu ya calo ukwa Bwina Kristu, Eugène ilingi line alelanda pali bougainvillea, icimenwa ca mwangashi icitabilila ico citemfuma mu miceele yakaba.—Mateo 22:21.

Eugène alelondolola ati: “Muno mu Kigali, bougainvillea alatwala amaluba yakashika, ayakashikila, kabili limo limo na yabuuta. Lelo, yonse yaba fye lupwa lumo lwine. E fyo caba na ku bantunse. Nangu cingati pambi kuti twaba aba mishobo, inkanda nelyo ifikulilo fya mikowa ifyapusanapusana, bonse twaba aba lupwa fye lumo lwine, mu lupwa lwa mutundu wa muntu.”

Ku ce shamo, te mulandu ne mibele yabo iya mutende no kukanaibimbamo mu milandu ya calo, ulu lupwa lwa baNtabana lwalipaiwe kwi bungwe lya batemwo bukomi. Nalyo line, bafwile aba busumino. Tuli abashininkisha ukuti Yehova Lesa akafikilisha ubulayo bwakwe ku ba musango yu, kabili bakabuushiwa ku kwisapyana icalo umushakabe na kabili impatila. (Imilimo 24:15) Pali iyo nshita, ulupwa lwa baNtabana, capamo na bambi, ‘bakailemeno bwingi bwa mutende.’—Ilumbo 37:11.