Icishinka pa lwa Helo
LIPOTI umo uwe bumba lya batuminwe ku kufwailisha pa fya cisumino ababa mu calici lya Church of England ilondolola ukuti helo kanshi te lungu lya mulilo; lelo, cifulo cishabako ukushaba bumi. Lipoti yalondolola ukuti, “Kuli imilandu iingi iyo kwabela uku kwaluka. Pali iyo milandu pali ukuilishanya ukufuma mu kati na ku nse ya buKristu pa lwa mipepele ya kutiinya, no kwibukila kulekulilako ukwa kuti imfundo ya kukwata Lesa uutwala amamilioni ya bantu ku kulungulusha kwa pe yalipusana nga nshi no kusokololwa kwa kutemwa kwa kwa Lesa muli Kristu.”
Uku kukanayumfwa bwino pa lwa fintu helo alemonwa ukutampa kale na kale takwaba fye mu Church of England. Abantu ukufuma mu mabumba ya mipepele ayalekanalekana cilabakosela ukupepa Lesa wa cilandushi uwooca ababembu. Jackson Carroll, profesa pa fya mipepele no bwikashi pa Sukulu lya fya Bulesa ilya pa Duke University asoso kuti: “Abantu bafwaya Lesa uwa cililishi kabili uwa citemwishi. Ukulanda pa lwa lubembu no kuba uwa mulandu caba kupusana no lutambi lwa lelo.”
Inte sha kwa Yehova pa nshita yalepa basumina ukuti helo, nga fintu Baibolo isambilisha pa lwa yene, yaba fye ni nshishi ukuya abantunse nga bafwa—te cifulo ca kulungulusha mu mulilo. Ico basuminina ifi, te pa mulandu wa kuti e cisumino caseeka, lelo pa mulandu wa kuti Baibolo itila: “Lelo abafwa bantu abashaishiba kantu nangu kamo . . . Takuli ica kucita nangu ca kwelenganya nangu kwishiba nangu mano ku Mbo [“helo,” Douay Version ya ciKatolika].”—Lukala Milandu 9:5, 10.
Mu kuba no ku kumfwikisha ukukuma ku lwa mibele ya bafwa, Charles Taze Russell, presidenti wa kubalilapo uwa Watch Tower Society, mu 1896 alembele ati: “[Mu Baibolo] tamwaba icifulo ca musango yo ica kulungulusha umuyayaya nga fintu ifisumino fya fya mipepele ne fitabo fya nyimbo, ukusanshako na bakasambilisha bashimikila mu kuluba. Nalyo line twalisangamo ‘helo,’ sheol, hades, ukuya umushobo wesu uwasenukwa pa mulandu wa lubembu lwa kwa Adamu, kabili uko twingalubulwa ku mfwa ya kwa Shikulwifwe; kabili uyo ‘helo’ ni nshishi—imfwa.”
Kanshi ukucila pa myaka 100, Inte sha kwa Yehova basambilisha icishinka pa lwa helo wa mu Baibolo.
[Icikope pe bula 32]
Charles T. Russell