Nani Uuteka?
“NANI ateka icalo?” Nga umo amwipwishe ico cipusho, kuti mwaasuka shani? Abatemwishe fya mipepele kuti pambi batila ni “Lesa” nelyo “Yesu.” Icipande icamoneke muli The Freeport News, inyunshipepala ya ku Bahamas, caaswike mu nshila abengi bashingenekela.
“Nasangile trakiti pa bwingililo bwa ŋanda yandi,” e fyo kalemba wa ico cipande atendeka. “Ilingi line ndafisuula ifintu ifyo bantumina muli yo nshila, lelo ili lyena napingwilepo ukuti mbelenge. Umutwe waipwishe icipusho ca kuti, ‘Nani mu Cituntulu Ateka Icalo?’” Mu kubelenga uyu trakiti washimpwa pali Baibolo, uyu mwanakashi asambilile ukuti kateka wa cino calo te Lesa nelyo Yesu lelo ni Satana Kaseebanya.—Yohane 12:31; 14:30; 16:11; 1 Yohane 5:19.
“Languluka ukukanalangulukilako kwacishamo mu bunkalwe bwabipisha,” e filondolola trakiti. “Abantunse balibomfya imiputule ya mwela wa sumu, inkambi sha kucushiwilwamo, ifyanso fya mulilo, amabomba ya mulilo, ne nshila shimbi isha buluku ku kulungulusha no kwipaya umo no munankwe mu kubulwa inkumbu. . . . Maka nshi yasesha abantu ukufika ku ncitilo sha musango uyo isha makankamike nelyo ukubakolokwela mu mibele umo bayumfwa abapatikishiwa ukucita ububifi bwakulisha? Bushe walibala aupapa nampo nga amaka yamo ayabifi, ayashimoneka e yalesonga abantu ukubomba incitilo sha musango uyo isha lukaakala?” Bushe kuti twapapa ukuti Baibolo yainika Satana ukuti “umulungu wa nshita ino”?—2 Abena Korinti 4:4.
Mu nsansa, inshita ili fye mupepi lintu Satana ne fibanda fyakwe bashakabeko na kabili. “Pano isonde paleya, no lunkumbwa lwa pako; lelo uucito kufwaya kwa kwa Lesa ekalilila umuyayaya.” (1 Yohane 2:17) Ee, Baibolo yalilaya ukuti abo abacito kufwaya kwa kwa Lesa balasubila ukwikala kuli pe na pe mu calo cipya ica bulungami. (Ilumbo 37:9-11; 2 Petro 3:13; Ukusokolola 21:3, 4) Mwandi kukaba kwilulukwa ilyo ukusonga kwa bubi ukwa kwa Satana ne fibanda fyakwe kukafumishiwapo!
Pa numa ya kusupawila ifyaba muli aka ka trakiti, kalemba wa ico cipande ca muli The Freeport News asondwelele ukuti: “Ndi uwa nsansa icine cine ukuti nalibelengele ulya trakiti . . . pantu na ine wine nalisakamikwa pa mibele intu icalo cibelelemo, no uciteka.”