‘Muli Lesa E mo Ndi no Kuuba’
MULI shino “nshita ishayafya,” amatunko ne fya kutitikisha filefulilako pe. Ku ca kumwenako, ubufumacumi bwesu pambi kuti bwaeshiwa kuntu tubombela. Pambi abanensu ba ku sukulu kuti baesha umusangwela wesu. Kabili icalo ici icakwata imibele yabotelela ilingi line cilesha bumpomfu bwesu.—2 Timote 3:1-5.
Kalemba wa Baibolo Asafi na o wine aleikala pa nshita lintu ububifi bwafulishe nga nshi. Bamo aba mu nkulo yakwe baleitakisha no kuitakisha pa mibele yo iishali ya bukapepa. Asafi alembele ati: “Bafwala amatutumuko e cisaamo mu mikoshi, baifwiko lufyengo e ca kufwala; balapumya, no kusoso bubi, basoso lumanimani lwa mu kuituumika.” (Ilumbo 73:6, 8) Bushe iyi mibele ikaaya?
Kuli abo bafwaya ukucita icalungama, imyendele ya musango yu ilalenga ukushikitika nga nshi, ilafuupula no kufuupula. Asafi alilile ati: “Nabo wapumwa akasuba konse. . . . Cali ca kucululusha mu menso yandi.” (Ilumbo 73:14, 16) Na imwe e fyo mwingayumfwa, lelo mwipelelwa iyo! Asafi alicimfishe ububifi bwa mu kasuba kakwe, na imwe bene kuti mwabucimfya. Lelo ni shani fintu mwingacimfya?
Asafi aishileiluko kuti ubulungami bwa cine bwalyafya nga nshi ukusanga nga ca kuti umuntu uushapwililika e uleteeka. (Ilumbo 146:3, 4; Amapinda 17:23) E ico mu cifulo ca konaula inshita yakwe iya mutengo, amaka, ne fyuma fyakwe ukulaesha ukupwisha ububifi bwali mu nshita yakwe, abikile amano ku kwampana kwakwe na Lesa. Asafi asoselo kuti: “Lelo ine, ukupalama kuli Lesa e cawama kuli ine; nacita Shikulu Yehova ukube cubo candi.”—Ilumbo 73:28.
Ilelo, abo baisansha mu bukwebo bwa bucenjeshi ilingi line balaipakisha ifya ku mubili. Abengi pambi kuti baitakisha no kuitakisha pa fintu baasuula amafunde ya kwa Lesa pa lwa mibele isuma. Lelo tabakatwalilile umuyayaya. Asafi asosele ati: “Cine cine umwatelela e mo mwababika; mwabawishisha ku kupumpuntika.”—Ilumbo 73:18.
Ee, mu nshita yalinga iya kwa Lesa, ubucenjeshi, ulukaakala, no kubotelela, pamo ne fibelesho fyonse ifishili fya bukapepa fintu Abena Kristu ba cine bafwile ukushipikishako fikafumishiwapo. Baibolo yalayo kuti: “Incitatubi shikafitwa; lelo abalolela Yehova, bene bakapyaninine calo.” (Ilumbo 37:9) Pali ino nshita, shi natuleibukisha amashiwi ya kwa kemba wa malumbo uwasoselo kuti: “Yehova e cilibwe candi icasansuka, licele lyandi, kabili wa kumpokolola; Lesa wandi, cilibwe candi icasansuka umo nguba.”—Ilumbo 18:2.