Inshita Shayafya ku Bakoloci

MAMA ONIYAN, uuli ne myaka 68, ekala mu musumba ukalamba uwa ku masamba ya Africa. Lintu aliko umwaice, aleelenganya ukuipakisha ubukote bwakwe na penshoni mu cibote, pamo na bana na beshikulu. Mu cifulo ca ico cila bushiku ashitisha amenshi yatalala mu kasuba katande mono. Utunono asangamo e tuntu apusukilamo. Abana bakwe babili bekala ku calo cimbi ica kutali. Papite nshita apo bamutumineko indalama.

Kale, abakoloci mu Afrika balekatamikwa sana. Balecindikwa pa mulandu wa kubelesha no kwishiba, pamo na mano no mucetekanya ifiisa pa mulandu wa uku kubelesha no kwishiba. Baleafwa ukukusha abeshikulu. Abacaice baleyako ku kupandwa mano no kwipushako fimbi. Abantu baleikala ukulingana ne funde lya Baibolo ilya kuti: “Ku cinso ca wa mfwi uleima, ulecindika ne cinso ca mukote.”—Ubwina Lebi 19:32.

Inshita nashaluka. Ubupiina, ukusumbana kwa mitengo, ubulofwa, no kukuuka kwafulisha ukwa kuya ku misumba kwalilenga abakoloci ukushala baleimwena. Dairekita wa kabungwe ka HelpAge, Kenya, Camillus Were, asosa ukuti: “Icishilano ca kwafwilisha no kusakamana abakoloci cileya cilebotelela.”

Kwena, ukubongoloka kwa fikakilo fya ndupwa takwaba fye mu Afrika mweka. Ukusosa pa lwa Japan, Guardian Weekly ishimiko kuti: “Ukuipeelesha ku lupwa kwali e cishintililo ca mibele ya ciJapanese iyapeelwe na buConfucius, lelo takwapusuka pa mulandu wa kukuukila mu misumba no kubongoloka kwa fikakilo fya ndupwa: amaperesenti 85 aya bena Japan bafwila mu fipatala nelyo mu mayanda ya kulelelamo abakote.”

Te mulandu ne mibele intu balimo, abo bafwaya ukutemuna Lesa mu cine cine balesha ukucindika abafyashi babo. Balomfwa ukufunda kwa Baibolo ukwa kuti: “Cindika wiso na noko . . . ukuti kuwame kuli iwe; kabili ube wa nshiku ishingi pano nse.” (Abena Efese 6:2, 3) Nangu ca kuti ukucindika no kusakamana abafyashi abakoloci takwaanguka lyonse, kuti kwaleta ifilambu fyawamisha.