Mu Mutalalila Filumbanya Uwafilenga

UKUWA kwa kasuba kwaliba ukwa kucebusha mu cifyalilwa. Lelo ukumoneka kwa kuwa kwa kasuba ku numa ya mpili sha Alps mu Italy, mu ncende ya Tuscany, kwaliba ukwaibela.

Nga mulemwena apataliko, akasuba kamoneka kwati kaleingila mu kati ka lupili te ku numa iyo. Mulandu nshi? Pantu pa muulu wa lupili palifonka no kumoneka kwati palifonkolwa ukufuma mu lupili. Te ca kupapa ukuti ulu lupili lwitwa Monte Forato—icipilibula Ulupili Ulwafonkolwa. Pa mulandu wa kuti isonde lishinguluka akasuba, miku fye ibili cila mwaka e lyo abantu bengamona akasuba palya apafonka kwati kaleingila mu kati ka Monte Forato.

Ukupala ububumbo bumbi, imyulu iishipeema ilalumbanya Kalenga wa iko. Ni shani fyo? Mu nshila imo ine icikope cawamisha cipeela ilumbo ku wacilengele. Na kuba, ububumbo bwa mu muulu bulondolola amaka, amano, no bukata ifya kwa Yehova. Nge fyo kemba wa malumbo asosele, “imyulu ilelondololo bukata bwa kwa Lesa, ne ulu lilelongolo mulimo wa minwe yakwe.” (Ilumbo 19:1; 69:34) Apo akasuba ne fintu fimbi ifishipeema filalumbanya Uwafilenga, fintu fwe bantu tufwile ukucishapo!—Ilumbo 148:1, 3, 12, 13.