Na Imwe Mukasangweko

NDJAUKUA ULIMBA ali ne myaka 73, kabili umwaka wapwile aendele ulwendo lwa makilomita mupepi na 450. Aendele fye pa makasa, kabili apoosele inshiku 16.

Uyu mwaume wa cikoloci aendele ulwendo lushailepela pa kuti engasangwa kuli limo ilya mabungano ya Nte sha kwa Yehova aya cila mwaka. Pa numa ye bungano, aali no buseko nga nshi kabili alikoshiwe lwa ku mupashi, na kabili abwelelemo pa makasa, pa nshiku na shimbi 16. Bushe aonawile fye nshita? Awe iyo! Ndjaukua Ulimba alyenda ulu lwendo cila mwaka kabili pa myaka iingi.

Uyu mwaume wa ku Afrika aali pa kati ka bantu amamilioni 15 mu fyalo ukucila pali 230 abasangilwe ku mabungano ya Nte sha kwa Yehova umwaka wapwile. Kwena, abengi tabaendele pa makasa pa nshiku ishingi pa kuya ku ncende ya kubunganinako. Abengi baile na bamotoka, babasi, amashitima, nelyo indeke. Bushe mwali pa basangilweko?

Kukabako na kabili amabungano ukushinguluke calo mu 1998, maka maka mu lusuba. Nga akaba bwino, Ndjaukua Ulimba afwile akenda ulwendo lumo lwine pa kuti akayesangwako. Amamilioni pamo nankwe bakakutika kuli programu iikabamo ifyo twingabomfya, iikoshe citetekelo, iya kusumbamo. Ibungano likabe cintu capulamo mu mwaka kuli bonse abakasangwako. Mu nsansa, na imwe mulelaalikwa ukuyasangwako. Inte sha kwa Yehova mu ncende mwikala bakaba aba nsansa ukumulanga incende ya kubunganinako mupepi.