Bushe Imilandile Yenu Ilacena Nelyo Ilondapa?

MULI shino nshiku shayafya, tatwingapapa nangu panono ukuti abengi ‘baliputuke misana’ kabili ‘balifunshike mitima.’ (Ilumbo 34:18) Muli fyo, ukulingana na mashiwi ya mutumwa Paulo, tulakabila lyonse ‘ukukosha abatompoke mitima’ no ‘kukoselesha abanaka.’ (1 Abena Tesalonika 5:14) Lelo kuti twacita shani nga ca kuti umunensu atubifya nelyo acita icilubo icabipisha? Mu fya musango yo, pambi kuti twayumfwe fyo cili fye bwino ukumulimwina ku mashiwi ya kumulungika. Nangu ni fyo, ukutekanya kwalilinga. Nangu fye ni lintu ukufunda kuli ukwalinga, kuti kwacena umo nga kwapeelwa mu nshila ya kukalifya. Amapinda 12:18 yatila: “Kuli akapuuka ka kusosa ngo kulasaula kwa lupanga.”

E co, lintu tulefwayo kulungika nelyo ukubombela pa kukanaumfwana kumo, calicindama ukwibukisha amashiwi yalekelesheko aya Amapinda 12:18 aya kuti: “Ululimi lwa ba mano lulaposha.” Lyonse iipusheni ukuti, ‘Musango nshi ine ningafwaya ukuti banungikilemo nga nalekabila ukulungikwa?’ Fwe bengi tulacilapo kumfwila ku kukoselesha ukucila ukumfwila ku kulengulula. E ico cishenipo ukutasha bambi. Ici ilingi line cikalenga uulufyenye ukufwaisha ukuwamyako ifintu, kabili cilemoneke fyo akacishapo ukutasha pa kwafwa konse ukwingapeelwa.

Ifyo cacindama lyonse ukuti tulebomfya amashiwi ya mutembo! Amashiwi yondapa yakalenga uuleyakutika ukushala aleyumfwa nge fyayumfwile kemba wa malumbo, uwalembele ati: “Uwalungama nga ang’uma, ninshi luse, kabili nga anjebaula, ninshi ansuba amafuta ku mutwe, ayo nshingatemwa kukaana.”—Ilumbo 141:5, NW.