“Ica Kumwenako ca Kwikatana na Bumunyina”

E fyo umwanakashi umo alondolwele imilimo Inte sha kwa Yehova babombele ilyo ali mu bulanda bwabipisha lintu lupwa lwakwe umo afwile. Alondololo kuti:

“Ine no lupwa lwandi, kuti twatemwa ukutasha Inte sha kwa Yehova aba mu cilonganino ca ciItalian ica mu Freiburg, ku Germany. Mu lupwa lwandi, ni Antonio fye indume yandi no mukashi wakwe Anna e Nte sha kwa Yehova. Pa myaka iingi twalesuusha imipepele basalile, nangu cingati lyonse twalepeela umucinshi kuli yene.

“Nangu cibe fyo, pali nomba tulingile ukwalula imitontonkanishishe yesu. Na kuba, twalikumanya ica kumwenako ca bumunyina no kutemwa ifyo tushali nakwenekela.

“Ku ca bulanda, Anna aafwile mu kupumikisha mu busanso bwa pa musebo. Apantu twikala ku Italy, tatwaletungilila sana ndume yandi Antonio na bana bakwe. Nangu cibe fyo, bamunyina bakwe baNte baishile mu kumwafwilisha. Balimwafwa ukupitila mu kuba nankwe, mu mashiwi yabo, mu citetekelo cabo, ukubomfya amaka yabo, imibele yabo, ne ndalama shabo. Apantu ne mwine te kuti nje mu kutasha cilya cilonganino, ndefwaya ukubatashisha muli magazini wenu pa mulandu wa ca kumwenako cabo ica kwikatana na bumunyina ubo tushakalabe.”

Tuletasha amashiwi ya cikuuku aya uyu mwanakashi. Nga fintu amwene, Inte sha kwa Yehova ni bamunyina ba mwi sonde lyonse. (1 Petro 2:17) Balalundulula icitemwishi cine cine pa kati kabo, pa kwishibo kuti ukutemwa “e kukakila fyonse mu kwitabana.” (Abena Kolose 3:14) Nangu fye mu mibele yabipisha, iingesa pali ifwe bonse, Inte sha kwa Yehova balambatila kuli Lesa na ku bantu bakwe.—Amapinda 18:24; Lukala Milandu 9:11; Yohane 13:34, 35.