Ilyashi lya Bakabilisha ba Bufumu
Mwikwinda Ukushimikila Imbila Nsuma
LINTU bakapansa ba ku Bulaya batandalile calo ca Venezuela na Bemba wa Maracaibo umuku wa kubalilapo, utuyanda twa mitenge ya cani utwakuulwa pa milando mu menshi ayashashika twali utwingi ukukonka ululamba. Iyi ncende yabebukisheko ulwa musumba wa Venice, ku Italy, kuntu abantu bakuula amayanda yabo mu lulamba. E mulandu bakapansa balelanda iciSpanish bainikile ilya ncende ati Venezuela, icipilibula “Umusumba Unono uwa Venice.”
Ilelo, kuli ukukuula kwa musango umbi muli ci calo cayemba. Kuli kukuula kwa ku mupashi. Inte sha kwa Yehova shilebombesha mu kubyala imbuto sha Bufumu pa nshita iili yonse. Ukulobolola kulefumamo ukulumbanya apakalamba “Umwine wa kulobolola,” Yehova Lesa.—Mateo 9:37, 38.
Lintu kangalila wa muputule atandalile icilonganino mu citungu ca Zulia pa kati ka kapinda ka ku kuso na ku masamba mu Venezuela, bakasabankanya ba kulya batantike ukuti atandalile pamo no mukashi wakwe icishi caba mupepi ica Toas. Ilyo bacili pa mulongo balelolela ubwato bwa lucelo ubwaleya ku cishi, Mery, umukashi wa kwa kangalila wa muputule, aebele uo alebomba nankwe, nkashi umutumikishi wa nshita yonse, ukuti balande na babomfi ba bwato. Nkashi painiya alisumine.
Mery atununwike kalungisha no kumutambika icitabo ca Ukwishiba Uko Kutungulula ku Mweo wa Muyayaya. Amulangishe icipandwa citila “Ukukusha Ulupwa Ulucindika Lesa,” kabili amoneke kwati alicitemenwe. Lyene Mery amulondolwelele fyo kuti asambilila Baibolo mu ng’anda mu mwakwe ukubomfya ici citabo. Alipokele icitabo, kabili balitantike ukuti umo engamutandalila ku mwakwe.
Tapapitile ne nshita, kwali ubushiku bwa kulongana kwaibela ku ncende ilya. Fintu Mery apapushiwe pa kumona kalungisha, Senor Nava kulya no mukashi wakwe na bana bakwe abanakashi babili! Mery aipwishe umukashi fintu aleyumfwa pa lwe sambililo lya Baibolo. Icasuko cakwe cali ca kupapusha nga nshi.
Alyaswike ati: “Ndatasha Yehova pa kusambilila icine.” E lyo atile: “Lintu mwalandile no mulume wandi e lintu anshile fye no kufwaya umwanakashi umbi. Kabili ali ni cakolwa. Inshita shimo nga akolwa, aleba uwa lubuli, icintu ico abantu ba pa cishi bashatemenwe. Alepupa ne mipashi. Nangu cibe fyo, ukusambilila Baibolo kwalimwafwa ukwaluka apakalamba mu bumi bwakwe. Alileka imisango yabipa yonse. Abafyashi bakwe baKatolika balitemwa nga nshi pa fintu ayaluka. Balitemwa sana pa kuti nomba alatusunga bwino bwino na bana.”
Senor Nava abatishiwe mu 1996 kabili pali nomba mutumikishi wa nshita yonse. Umukashi wakwe, Jenny, abatishiwe mu 1997. Mwine mushi wa muli lilye tauni alitemenwe nga nshi fintu kalungisha wa mato ayalwike ica kuti atile na o alefwaya ukusambilila Baibolo. Fintu bankashi baba ne nsansa pa kuti tabakwindile ukushimikila imbila nsuma ilyo balelolela ubwato pa mulongo lulya lucelo!
[Ifikope pe bula 7]
Ukushimikila imbila nsuma kuli kalungisha wa mato kwafuminemo insansa