Ukutemwa Ukwacila pa kwa kwa Nyina

PA FITESHENI fya mashitima, mu fimbusu, nangu fye mu misebo umwafulisha bamotoka na bantu, e mo banyina balepoosa utunya. Inshita shimo, abakuse fisooso balatoola utunya mu ng’ungulu utwa kuti natunaka ku kulila ukufwaya banyina. Ipepala lye lyashi ilya O Estado de S. Paulo, lyatile, “Ukupoosa abana mu misebo kuleilako fye pa ntanshi.” Kwena, nyina wacaice nalimo kuti aba no bulanda pa numa ya kupoosa umwana. Lelo, alamupoosa fye, ukwabula no kusakamana ifikamucitikila.

Kuti mwapapa amuti: ‘Ni shani nyina engapama ukupoosa umwana wakwe ukwabulo kusakamana ne fikamucitikila?’ Baibolo ibomfya iyo mibele ya bulanda mu mampalanya ku kutulondolwela fintu Kalenga wesu atutemwisha ukupusana nga nshi na nyina wa buntunse, itila: “Bushe umwanakashi engalaba akanya kakwe akoonka, ukukanacitilo mwana wa mwi fumo lyakwe inkumbu? Ukuba kwena aba bengalaba, lelo ine nshakalabe iwe iyo.”—Esaya 49:15.

Cine cine, Lesa alitutemwisha kabili alyangwako ku kukabila kwesu ukucila pali nyina uuli onse. Nampo nga uli mwaice nelyo muli bakalamba, te mulandu na mafya yengamuponena, tamwaba mweka. Kalenga wenu alimutemwa kabili afwaya ukuti cilemuwamina. Amashiwi ya kwa kemba wa malumbo yatila: “Ilyo tata na mayo bandekelesha, e lyo Yehova ambuula.”—Ilumbo 27:10.

Mwi sonde lyonse, bamagazini ba Ulupungu lwa kwa Kalinda na Loleni! balasabankanishiwa ku kusambilisha ukwishiba ‘Lesa wine wine eka,’ Yehova, no Mwana wakwe, Yesu Kristu. Kuti mwafuma umweo wa muyayaya kuli abo mu kutasha basambilila uku kwishiba.—Yohane 17:3.