“Abaleepa Ngo Mukedari wa mu Lebanone”

PA MPILI shayemba isha Lebanon pabe miti iitwa Arz Ar-rab, icipilibula “Imikedari ya kwa Shikulu.” Mu Baibolo tapaba umuti uuli onse uwalumbulwa imiku 70 nge fyalumbulwa iyi miti yalulubala iimoneka iyafunda lyonse, iyo pa nshita imo yakupile ishi mpili.

Pa kulondolola iyi miti yalulubala iya mu Lebanone, Amalembo yabomfya amashiwi ya “uwasoboloka” na “uukankaala.” (Inyimbo sha Bulanda 5:15; Esekiele 17:23) Umukedari walibomfiwa pa nshita ntali ukukuulilako amayanda na mato ne fipe fya mu ng’anda pa mulandu wa bukulu no kukosa kwa uko. Icinunko no kukashikila kwa uyu muti filacebula abantu, kabili taubola nelyo ukuliiwa ku bubenshi pantu walikwatisha ubutomfi bwa nkaki. Iyi miti iitali kabili iikulu icine cine, yalepa amamita 37 na mu bufumo amamita 12, kabili yaba ne mishila iitali kabili iyashansha. E mulandu wine abasambilila pa lwa miti aba muno nshiku balondolwela imikedari nge “miti iyacindamika impanga”!

Kalemba wa Baibolo Esekiele apashenye Mesia ku kamusambo ka mukedari, ako Lesa alimba. (Esekiele 17:22) Na kuba, ishiwi lya ciHebere ilibomfiwa ku “mukedari” lyafuma kwi shiwi ilipilibula “ukushansha.” Ilelo, abakonshi ba kwa Mesia, Yesu Kristu, na bo bene bakabila ‘ukwiminina ndi mu kutetekela, . . . ukushansha,’ ngo mukedari uwalepa, kabili uwashansha. (1 Abena Korinti 16:13) Cinshi cingabafwa ukushansha? Bafwile ukushipa ukwansha ukusonga kushili kwa Bwina Kristu no kupampamina pa kushipikisha muli bumpomfu na muli bukapepa. Mu Baibolo abacite fyo balondololwa nga ‘abalungami . . . [abakaleepa] ngo mukedari wa mu Lebanone.’—Amalumbo 92:12, The New English Bible.