Ilyashi Lya Bakabilisha Ba Bufumu

Uwalefwayafwaya Lesa wa Cine Asuka Amusanga

MU MWANDA wa myaka uwalenga 10 B.C.E, ubufumu bwa ciYuda ubwa mikowa ibili bwalitebelelwe ku kupepa kwa bufi. Lelo kwena, umu mwine umwayanene nga nshi ukupepe filubi, e mwali no muntu wa mutima walungama kuli Lesa. Ishina lyakwe ali ni Yehoshafati. Ukulanda pali wene, kasesema Yehu atile: ‘Ifintu fisuma fyasangwa muli iwe; pantu . . . wateyanya umutima obe ku kufwaya Lesa.’ (2 Imilandu 19:3) Ukupalako ilelo, muli shino ‘nshita shayafya’ abengi nga nshi ‘baliteyanya imitima’ yabo ku kufwaya Lesa wa cine, Yehova. (2 Timote 3:1-5) Kuti twashininkishe co muli ili lyashi lifumine ku Togo, ku masamba ya muno Afrika.

Casimir alesambilila pa sukulu lya baKatolika kabili asangilwe ku Minsa ya kupoke mfumu pa muku wa kubalilapo lintu ali ne myaka 9. Lelo kwena, lintu alekumanya imyaka 14, ninshi kale kale alileka ukuya ku calici. Ici camulengele ukuba no mwenso pantu aletontonkanya ukuti ukupuswa ku Minsa kukamulenga ukuya ku kupya muli helo, nelyo Lesa nga amubelelako uluse, ninshi akaya ku mutwala.

Ku sukulu, Casimir ailundile kwi bumba lya bacaice abalekumana cila mulungu ku kusoma Baibolo. Alitendeke no kubelenga Baibolo eka. Akashita kamo, abelengele mwi buuku lya Ukusokolola pa lwa ciswango ca kutiinya icalefuma muli bemba. (Ukusokolola 13:1, 2) Lintu aipwishe intungulushi ye bumba lyalesoma Baibolo, yamwebele ukuti cilya ciswango ca cine cine kabili cikesa ukufuma muli bemba. Lintu Casimir aumfwile fi, atiinine icibi pantu aleikala fye mupepi na ku lulamba lwa bemba wa Atlantic. Alitiinine ukuti akaba pa bantu cilya ciswango cikabalilapo ukusansa ilyo cikesa.

Casimir atendeke ukusunga indalama sha bulendo bwa kuya ku kapinda ka ku kulyo ku ciswebebe, pa kuti engabutuka iciswango. Ashimikiileko uo alesambilila nankwe mu kalasi pa lwa mapange yakwe aya kubutuka. Apo ali ni umo uwa Nte sha kwa Yehova, ulya musambi munankwe amwebekeshe ukuti takwakatale akuba iciswango ca cine cine icikafuma muli bemba. Ilyo papitile fye akashita kanono, Casimir balimulaliike ku kulongana ku Ng’anda ya Bufumu. Ukulongana kwalimuwamine nga nshi kabili atendeke ukusangwako lyonse. Lyene alisumiine no kusambilila Baibolo pa ng’anda.

Ilyo Casimir alelunduluka mu cine, balupwa batendeke ukumukaanya. Pa ng’anda balepepa ifikolwe kabili balelya inama shatitilwa ishaleshalapo pa numa ya kupeela amalambo. Ilyo Casimir mu mucinshi akeene ukulyako, balimutiinishe no kumusoka abati bakamutamfya pa ng’anda. Casimir alikeele ukwabula mwenso, nomba tabamutamfishe pa ng’anda. Lelo kwena pa myeshi itatu, cila bushiku, baleipika fye shilya shiine inama pa ng’anda. Casimir talekwata fya kulya fiine fiine, lelo alishipikishe ubu ubwafya, ukusanshako na mafya yambi.

Casimir alitwalilile ukulunduluka lwa ku mupashi ukufikila ukuipeela no kubatishiwa. Mu kuya kwa nshita, alisontelwe ukuba umubomfi utumikila kabili alisangilwe kwi Sukulu lya Kukansha ilya Butumikishi ilyalenga bune mu Togo. Ino nshita ni kabomba wa kuitemenwa pa maofeshi ya Sosaite.

Cine cine amashiwi ya Mfumu Davidi yalabomba inshita fye ishingi, ayatila: “Nga wafwaya wene, kuti asangwa kuli iwe.”—1 Imilandu 28:9.

[Ifikope pe bula 8]

Casimir (uuli ku kulyo) abomba umulimo wa kuitemenwa pa maofeshi ya Sosaite