‘Kansha Umwaice’

UBULIMI pa kutunguluka bufwaya ukupoosako amano, te kupoosaika fye imbuto mu mushili, cilya papite myeshi e lyo mwayako ku kuyasombola fye. Kulaba ukupiba nga nshi ilibe pa kulima, ukubyala, ukutapilila no kusekwila, pa kuti fye imbuto shikule ukufika ku kupya.

Uyu mulimo kuti watulangilila bwino fintu amashiwi ya pa Amapinda 22:6 yaba aya cine. Patila: “Kanshisho mwaice umo afwile ukubela, ilyo akakota takafumemo.” Cine cine, ukukanshiwa ku bafyashi e kwacindamisha, pa kuti abana bengakula bwino.

Lelo muli cino calo ca mulekelesha, abafyashi abengi balafilwa ukumfwila uku kufunda. Lintu bakonka amano ya kuipangila abene abati abana bafwile ukuishibila abene ifya kupikulula amafya, balaleka abana babo baleicitila fintu balefwaya. Ukubaleka muli yo nshila kulenga abengi ukubatoola cangwa ku bantu ba muli cino calo abapusauka, ifinangwa.—Amapinda 13:20.

Fintu cawama ku bafyashi ukufunda abana ifishinte fya Bwina Kristu pa kubangilila ukubakansha ifya bulesa! Bushe ukubangilila ni lilali? Umutumwa Paulo atile, “Ukufuma ku bwaice.” E fyakanshiwe umulumendo Timote. Nyina Yunike na nakulu Loisi bamukonkomeshe “amalembo ya mushilo” yantu ‘asambilile’ no ‘kutetekelako.’ Finshi fyafuminemo? Ukukansha kwa musango yo kwamulengele ‘ukuba na mano ayamuloseshe ku kupusuka.’—2 Timote 1:5; 3:14, 15.

E cimo ciine na lelo, abafyashi ‘abashinenuka mu kucita icawama’ bakamwenamo ifilambu fyafumba, kulila ‘tabatompweke.’ (Abena Galatia 6:9) Imfumu ya mano Solomone yatile: “Ukwanga kuti ayanga wishi wa mulungami.”—Amapinda 23:24.