“Naliimwenene Ukuti Bantu ba Mutende”

UMWAUME uulanda ululimi lwa bena Germany aile kwi bungano lyateyanishiwe ne Nte sha kwa Yehova ku “kubalengula.” Mulandu nshi? Pantu alefwaisha “ukusansalika abapepa muli ici cakaniko no kupususha abanankwe kuli aba bakabepa.” Pa numa ya kusangwa kwi bungano, alembeele abanankwe uyu kalata:

“Lintu napaleme uko balongene, natendeke ukumona kwati ninduba. Nshamwene umuntu nelyo umo kabili takwali amapepala nelyo ifikopo fya bwalwa fintu bapoosaike. Ilyo nafikile mupepi, namwene abaume babili aba busaka nabeminina lwa pa mwinshi. Balimposeshe no kunjeba ukwingila.

“Naletontonkanya ukuti mukabile na see ku congo ku mulandu wa bantu ubwingi, nomba mwatalele tondolo. Mu mutima nati ‘na kuba muli abantu banono fye abekele pale pale mu cibansa.’

“Kuti ukwingila, apo pene napoosele amano ku cilangililo baleangala pa cisebele. Ninshi napapita ne nshita, e lyo nalolekeshe no kumona icibansa ciswile paa, mwali abantu abengi nga nshi abalekutikisha. Naliimwenene ukuti bantu ba mutende. Fintu naumfwile no kuimwena ilyo naikele no kutwalilila ukumfwa amalyashi, fyalimpitile ku mutima.

“Lintu nali pamo ne Nte sha kwa Yehova, naliimwenene fintu baba aba nsansa kabili aba kutemwa. Awe mwandini, tapali mumbi umo ningalosha, ‘Aba bantu cine cine, bantu ba kwa Lesa.’”

Mu cifulo ca ‘kupususha abanankwe kuli aba bakabepa,’ uyu mulumendo alombele Inte sha kwa Yehova ukutendeka ukusambilila Baibolo na wene. Cinshi cafuminemo? Ilelo ni eluda wa Bwina Kristu. Ena capamo no lupwa lwakwe baba mu filonganino fya mu Zug, ku Switzerland.