Ishina lya kwa Lesa Lyabweshiwamo

“PA NUMA ya kupitapo imyaka iingi nalimo imintapendwa ya myaka apo ishina Yehova lyafumishiwa mu maBaibolo, Inte shakwe isha muno nshiku e mipepele fye yeka iya Bwina Kristu iyaiminina pa kubweseshamo tetragramatoni.”a

Amashiwi ayali pa muulu yafumine mu citabo icileti Jeová dentro do Judaísmo e do Cristianismo (Jehovah in Judaism and Christianity), icalembwa no mwina Brazil, Assis Brasil. Lelo kuti twaipusha atuti, Nangu cingati amabupilibulo ya Baibolo aya ncepela yalabomfyako ishina lya kwa Lesa, mulandu nshi imipepele imbi ishabikilamo ili shina mu maBaibolo yabo? Brasil atila: “Ishina lya kwa Lesa lifwile lyalifumishiwemo pa mulandu wa kutiine mipashi . . . , ukukwata amapange yalubana nelyo ukufwaisha ukusansabika amashina ya kwa Yesu na nyina, Maria.”

Nangu cibe fyo, Brasil alondolola bwino ati: “Mu ciPortuguese, New World Translation of the Holy Scriptures yalilungika umupwilapo ubwafya bwa kukanabikamo ishina [lya kwa Lesa].” Mu nshila nshi? Pantu muli uyo Baibolo ishina Yehova lyalibweshiwamo mu fikomo umo lifwile ukuba. Muli New World Translation ishina Yehova lyabamo imiku ukucila 7,200.

Ukutula apo uyu Baibolo afumina, amakope ukucila pa mamilioni 6 na hafu aya ubu bupilibulo bwa muno nshiku ubwa kukonka amashiwi yalyananishiwa mu ciPortuguese. E ico, kalemba wa lyashi mu nyunshipepala ya Diário do Nordeste (Northeastern Daily) aipwishe ati: “Bushe mwalishibo kuti Lesa alikwate shina?” Ubu bupilibulo bwa Baibolo ubwa muno nshiku bwalilenga abengi ukwasuko kuti, “Ee alikwata. Ishina lya kwa Lesa ni Yehova.”

[Futunoti]