Belengeleni Capamo na Bana

Inyunshipepala ya ku Brazil iitwa Veja yatile abana abafyalwa ku bafyashi aba mute wa kubelenga cilabangukila ukutemwa ukubelenga ukucila abakulila mu mayanda umo bashatemwa ukubelenga. Martha Hoppe, incenshi mu fya mikulile ya bana, atile: “Ukubelengela capamo kulakosha icitemwiko pa kati ka bafyashi na bana no kulenga abana ukumfwikishe filebelengwa.”

Ukubelengela abana mu kupongomoka na kabili kupeela mwe bafyashi ishuko lya kwasuka ifipusho. Kuti mwalanshanya pa fikope ifili fyonse ifili mu fyebo mulebelenga. Hoppe atila: “Ukumfwikisha ifili mu citabo kulalenga umwana ukufwaisha ukubelengamo na kabili, pantu alaba ne cilaka ca kufwaya ukwishibilapo na fimbi.”

Abafyashi abengi Inte sha kwa Yehova balaipakisha ukubelengela capamo na bana. Kuti babelenga ifitabo ifili nga, Icitabo Candi ca Malyashi ya mu Baibolo, Ukukutika kuli Kasambilisha Mukalamba, ne ca Umuntu Wakulisha Uwabalile Abako Uwa Mweo.a Ifi fitabo filafwa abana ukuba bakabelenga basuma kabili filabalenga ukutemwa icitabo cacilishapo ukushitwa mu calo conse, Baibolo wa Mushilo. Kanshi nga muli bafyashi, beni ica kumwenako ku bana benu pa kuba bakabelenga baswangana aba Cebo ca kwa Lesa. (Yoshua 1:7, 8) Kabili nangu cibe shani, sangeniko akashita ka kubabelengela!

[Futunoti]