Ukutemwa ‘aba Bwananyina bwa mu Citetekelo’
ABENA KRISTU bene bene batemwana nga aba mu lupwa lumo. E mulandu wine, ukufuma fye mu mwanda wa myaka uwa kubalilapo C.E, betana ati “munyina” na “nkashi.” (Marko 3:31-35; Filemone 1, 2) Aya mashiwi tabayalanda fye mu kanwa; yalangilila ifyo abapepa Lesa bamona abo bapepa na bo. (Linganyeniko 1 Yohane 4:7, 8.) Yesu atile: “Muli ici e mo bonse bakeshibilo kuti muli basambi bandi, nga mwaba no kutemwana.”—Yohane 13:35.
Ukutemwana kwa musango yo kwalimonekeshe mu July 1997, pa numa ya cilala, kwaishileba imiloke iyalengele ilyeshi ku Chile. Mu kupumikisha, abengi balekabila ifya kulya, ifya kufwala, na fimbipo. Nga kwapona ubusanso, Inte sha kwa Yehova shilatukuta ukukonka ifyo Paulo akonkomeshe abena Galatia ukuti: “E ico cena, lyonse ilyo twaba ne nshita, tubombe icisuma kuli bonse, no kucishamo ku ba bwananyina bwa mu citetekelo.”—Abena Galatia 6:10.
E co, bwangu bwangu Inte sha kwa Yehova shaliiteyenye pa kuti shingacitapo fimo. Balonganike ifya kulya, ifya kufwala, ne fintu fimbi. Balifisoobolwele, bafilongele bwino kabili bafitwele ukwaponene ubusanso. Na bana bene balisangwilileko ifya kwangasha! Nkashi umo alisungwike nga nshi ilyo amwene mu Ng’anda ya Bufumu namwisula ifipe fya kukumbusuka. Atile: “Nakankamene fye, nshaishibe nga mfwile ukuseka nangu ukulila, ifyo batuletele twalefikabila nga nshi.”
Lyene, icinkukuma mu kupumikisha calipitile muli ilya ine ncende umwali ilyeshi no kubongolola amayanda ayengi. Pa kuti kwingaba ukubombela pa kukabila, bakomiti balundwapo aba kukumbusuka balipangilwe. Bakomiti ba Makuule aba mu Citungu abo nga ni lyonse babombela ku makuule ya fifulo fya kulonganinamo ifya Nte sha kwa Yehova, na bo balyafwilisheko. Cinshi cafuminemo? Bamunyina abo amayanda yabongolweke balibakuulile ayasuma, na kuba na mapulani yene ni bamunyina bashilile. Nangu cingati aya mayanda tayali ya lulumbi, yalipusene sana na yakuulile bambi abo utwampani twapeele amaloni ya kukumbusuka pa kuti bengakuula amayanda, pantu bena tababikile amawindo kabili tabapentele, e lyo tayashingwilwe no kushingulwa pa nshi.
Bamunyina bamo bafumine ukushailepela ukuyaafwilishako. Ceyamani wa Komiti wa Makuule uwa mu Citungu aendawike nga nshi kuli ilya ncende pa nshiku shibili ishakonkana, te mulandu no kwendela mu cicinga ca balemana. Munyina umo impofu abombele incito ya cibe, ukusenda imbao ukutwala kuli kabasa pa kuti engashiputula bwino bwino. Lyena munyina umbi nkomamatwi asendele imbao no kushitwala uko balekuula.
Abalemonako abengi balitemenwe nga nshi ifyo bamunyina baafwilishe. Mwi tauni limo bakapokola baimike motoka mupepi na po bamunyina balewamya ing’anda ya kwa nkashi. Balefwaisha ukumona ifilecitika. Kapokola umo aipwishe munyina ukuti: “Bushe aba abalebombela apa ni bani abali ne nsansa sha musango yu, bafola shinga?” Munyina atile bonse ni bakabomba bakuitemenwa. Kapokola umo ashimike ukuti cila mweshi alalipila indalama ya mutuulo ku calici, lelo pasita tatalile amupempulako apo icinkukuma capitiile! Ubushiku bwakonkelepo ulya nkashi apokelele lamya ukufuma ku mulashi wa bakapokola, na o wine uwamwene bamunyina ninshi balebomba. Atile alitemenwe nga nshi ifyo bakabomba baali abaswangaana, ni cikanga na o aipoosepo pali lilye bumba.
Cine cine, umulimo wa kukumbusuka mu Chile waletele ukusangalala kuli bakabomba bakuitemenwa kabili wali bunte bushaiwamina ku bamweneko.