Ica Kwafwa Ukusala Ifibusa Fisuma

ILYASHI limo muli Reader’s Digest lyasosele ukuti pa kusala ifya kufwala nelyo inyimbo, abacaice baya ku banabo ukucila ku bafyashi. Kanshi calicindama ku bafyashi ukwishiba abangala na bana babo kabili na kuntu bangalila.

Kafundisha umukokole pa yuniversiti ya ku South Africa uwaishibisha ifya mitontonkanishishe Esmé van Rensburg atile, “ni ncito yenu iya kufwailisha.” Akonkanyapo no kuti: “Ukwabula no kutwishika umwana wenu takatemwe, lelo akasuka akabelele.” Lyene apandako amano abafyashi. Atila amafunde yafwile ukubamo amano no kushimpwa pa fishinte fya cine cine; kutikeni ku mwana wenu; te kwesha ukukalipa, lelo tekanyeni, no kwishiba ifyo mulefwaya ukusosa. Nga ca kuti umwana wenu alikwata kale ifibusa fishawama, landeni sana pa fyo bucibusa bwakwe buleteleko imisango yabipa mu cifulo ca kumukanya fye ukulaangala na bo.

Ukupanda mano kusuma e mo kwaba kale mu Cebo ca kwa Lesa, Baibolo. Ku ca kumwenako, itila: “Umuntu onse abe uwayanguka ku kuumfwa, uwakokola ku kulanda, uwakokola ku kukalipa.” (Yakobo 1:19) Amalembo na kabili yapeela uku kupanda mano kusuma pa lwa fibusa ati: “Enda na ba mano e lyo ukabo wa mano, lelo uucito bunabo ku bawelewele akacula.” (Amapinda 13:20) Ifi fya kumwenako filelangilila amano bengasanga ababelenga Baibolo no kukatamika ifyabamo no kufibomfya cila bushiku.