“Umucele Nga Nausunduka”

UMUCELE walimonwa ku bantunse nge cintu cacindamisha nga nshi. Balilwilapo inkondo. Baliubomfya mu kukaabushanya. Mu China, golde e cintu fye ceka icacilile umucele. Ukufika na lelo, ulapangilwako imiti ya kundapilako no kusangulwilako, kabili ulabomfiwa mwi sonde lyonse ku kulunga mu filyo ku kuleka fiwame kabili na ku kufibakilila.

Ni pa mulandu wa mibele isuma iya mucele ne fintu ubwingi ifyo ubomba, e co Baibolo iubomfesha mu mampalanya. Ku ca kumwenako, Amalango ya kwa Mose yalefwaya ukuti conse icapeelwa pa cipailo kuli Yehova cilungwemo umucele. (Ubwina Lebi 2:13) Ici tacalecitwa ukuti amalambo yalowe, lelo cilemoneke fyo ni mu kuti umucele waleimininako ubuntungwa ukufuma ku kubola.

Mu lyashi lyakwe ilya pa lupili ilyalumbuka, Yesu Kristu aebele abakonshi bakwe ati: “Imwe muli mucele wa pano isonde.” (Mateo 5:13) Yesu aloseshe mu kuti ukushimikilako bambi pa lwa Bufumu bwa kwa Lesa kwali no kukwata amaka ya kubakilila, nelyo ukupususha imyeo ya bakomfwa. Na kuba, abalebomfya amashiwi ya kwa Yesu bali no kucingililwa ku kubotelela kwa mibele no kubola kwa ku mupashi mu mekashi baleikala no kubombela.—1 Petro 4:1-3.

Lelo, Yesu asokele no kuti: “Lelo umucele nga nausunduka, . . . tauwamine cintu kabili iyo, kano ukupooswa ku nse, no kunyantaulwa ku bantu.” Uwasoma ifya Baibolo Albert Barnes alandilepo ukuti umucele wa mu nshiku sha kwa Yesu na batumwa bakwe “tawali mucele weka weka, walesaakanamo icani ne loba.” E co nga wasunduka, “kuti washala fye iloba.” Barnes atile “nga wabe fi ninshi wa cabe cabe . . . baleubika fye mu nshila kwati ni fintu tubomfya insakalabwe mu misebo.”

Pa kumfwila uku kusoka, Abena Kristu balingile ukusakamana pa kuti tabalekele ukushimikila ku cintubwingi kabili pa kuti tabawilile mu myendele iishili ya bukapepa. Nga tabacenjele kuti babotelela lwa ku mupashi no kuba fye aba cabe cabe, kwati ‘mucele uwasunduka.’