“Umulume wa Nsansa uwa Mukashi Musuma”

INSHITA shimo shimo, abantu bapeela Inte sha kwa Yehova umulandu wa kutoba mayanda. Lelo icishinka ca kuti ifyupo ifingi umwaba umulume nelyo umukashi uuli Inte ya kwa Yehova tafibongoloka. Ukumfwila ukufunda kwa mu Baibolo mu bumi bwa lupwa, kulaleta insansa mu fyupo, nga fintu kalata walembelwe mu nyunshipepala ya ku France uwambwilwe pe samba alelangilila.

“Mupepi ne myaka 28 nomba, naliba umulume wa nsansa uwakwata umukashi umusuma kabili ni Nte ya kwa Yehova. Umukashi wandi akushishe abana basano, babili pali aba tabali ba kuifyalila iyo, lelo bonse abasungile capamo ukwabula umuncishanya. Pali nomba, ndi dairekita pa kampani ka babomfi 45, kanshi umukashi wandi alingafwa sana mu kutunguluka kwa mibombele yandi. E calengele ilintu namwene ilyashi mu nyunshipepala nshitako lyonse ilya kusuusha Inte sha kwa Yehova mu Lot-et-Garonne, nalikuntukilwe no kulemba icali icishinka ukwabulo mwenso.”

Kalata umo wine alundilepo ukuti: “Inte sha kwa Yehova tashikolwa kabili tashipeepa na fwaka. Bushe ukube ifi e kwingalenga ukuti babipe? Baba Bena Kristu bashipatikisha uuli onse ukukonka amafunde bakonka. Lelo babika ica kumwenako cisuma mu nshila ishingi. . . .Tababamo mu milandu ya fya ndalama nelyo ukuibimba mu kusulwisha imiti ikola. Tabacita imilapo ya fya mapepo, kabili ne mikalile yabo yaba fye nga bantu abatuntulu. . . .

“Limbi kuti mwanjipusha amuti: Nga ni fyo mulandu nshi iwe ushabela Inte ya kwa Yehova? Ni pa mulandu wa kuti icitetekelo ca Bwina Kristu ne mibele yakosa filakabilwa, kabili tacaba icayanguka ku muntu fye uuli onse.”