Ukulinga Inshita ya Kubomba ne ya Kukokoloka

KALEMBA umo uwafishile ishina lyakwe alondolwele ubucindami bwa kulinga inshita ya kukokoloka pamo nge “ca kufwala icisuma sana, lelo icishingakokola nga ca kuti cilefwalwa libili libili.” Na muli fyo alangilile fintu ukukokoloka kufwile kwashako inshita ya kubombako incito shimbi.

Nelyo ni Solomone kalemba wapuutwamo uwa Baibolo alilandilepo. Iyi mfumu ya mano yalilumbwile ifintu fibili ifyo tufwile ukusengauka. Ica kubalilapo, ca kuti: “Umuwelewele aolopa amaboko yakwe, no kufyengo mubili wakwe wine.” (Lukala Milandu 4:5) Ca cine, ubunang’ani bulaleta ubupiina. Kabili ubunang’ani bulaleta na malwele no kubika ubumi mu busanso. Kumfwa bambi na bo, bapoosa inshita yabo yonse mu kufwaye cuma. Solomone alumbulula ukubombesha kwabo ngo “mupu no kufuluko mwela.”—Lukala Milandu 4:4.

E co kanshi kwaliko umulandu usuma Solomone akoseleshe ukulinge nshita lintu alandile ukuti: “Ulupi lumo ulwa kutusha lusuma ukucile ndupi shibili isha kucucutika no kufuluko mwela.” (Lukala Milandu 4:6) Umuntu afwile ‘ukuimweno busuma ku kucucutika kwakwe’ e kutila afwile ukushako inshita ya kuipakisha ifyo anonkele. (Lukala Milandu 2:24) Kabili kufwile kwabako na fimbi ifya kucita mu bumi te ncito ya ku mubili fye. Tufwile ukushako inshita ya kuba pamo no lupwa lwesu. Solomone akonkomeshe ukuti umulimo wa kwa Lesa e ca buntunse bonse, te ncito ya ku mubili. (Lukala Milandu 12:13) Bushe na imwe mulalinga inshita ya kubomba?