Ilyashi lya Bakabilisha ba Bufumu

Ukulunduluka kwa Teokrasi mu Namibia

IMBILA nsuma ya Bufumu bwa kwa Lesa yafikile mu Namibia ku kupwa kwa ba 1920. Ukutula lilya, abantu abengi aba mitima ya bufumacumi balyankula kwi landwe lya kupususha kwa kwa Lesa. Ifya kukumanya fili pe samba filelangilila fintu Yehova aleleta abantu abasuma mu ng’anda yakwe.—Hagai 2:7.

◻ Paulus ekala lwa ku kapinda ka ku kuso aka Namibia, kabili mulimi uulima fye utwa pakanwa, umuku wa kubalilapo ukulanshanya ne Nte sha kwa Yehova ni lintu aile ku Windhoek, umusumba wa bwangalishi mu Namibia. Mu kwangufyanya Paulus alishininwe ukuti nasange cine. Ilyo alebwelelamo ku mwakwe aile ne citabo ca Kuti Waikala Kuli Pe na pe muli Paradise Pe sonde. Inshita imbi kabili lintu aile ku Rundu, itauni lyapalamina no kwali Ng’anda ya Bufumu, asangile Inte sha kwa Yehova no kubepusha nga kuti bamutandalila.

Lelo pa mulandu wa ntamfu ukulepa, ba Nte bafililwe ukumutandalila no kutungulula isambililo lya Baibolo ilya cila mulungu. Nangu cibe fyo, Paulus tafuupwilwe lelo atendeke ukuisambilisha Baibolo. Kabili mu kupimpa ashimikileko bambi fintu alesambilila. Mu kupita kwa nshita, bapangile ibumba no kutendeka ukusambilila Baibolo. Lintu baumfwile pa cilimba ukuti ku Rundu kwali no kuba ibungano lya Nte sha kwa Yehova, basakenye ndalama sha kwendela.

Mwandi balisansamwike nga nshi pa kubishanya ne Nte sha kwa Yehova umuku wa kubalilapo! Bamunyina bafikapo bapekenye ukulatandalila aba bantu lyonse. Pali lelo mu mushi Paulus ekala muli bakasabankanya 6.

◻ Johanna atendeke ukutemwe shina lya kwa Lesa lintu aumfwile umuntu umo alesuusha Inte sha kwa Yehova. Ebukisho kuti: “Umuku fye wa kubalilapo ukumfwe shina Yehova nalilisungile mu mutwe, kabili natendeke ukufwaya ukwishiba untu Yehova aba. Naleikala na balume bandi lwa mupepi na Walvis Bay ku lulamba lwa Namibia. Lintu twaile mu tauni bushiku bumo, namwene Inte mu misebo baleshalika bamagazini ba Ulupungu lwa kwa Kalinda. Apo nalikwete amepusho ayengi, napokeleko magazini umo no kulombe sambililo lya Baibolo. Lintu banjebele ukuti tabaali no kwisa pantu motoka yabo yalifwile natendeke ukulila. Tapakokwele abalume bandi balifwile, kabili naile mu kwikala ku Keetmanshoop. Ilyo painiya waibela aishile mu kubombela kulya, napokeleko icitabo caleti Icine Icitungulula ku Bumi bwa Ciyayaya. Natendeke ukucibelenga, kabili nakutulwike ukuti ici e cine.

“Kuli pele pele, bandalike ukuya mu kushimikila, lelo naletiina abantu sana. Ilyo twaleshimikila ku mwinshi no mwinshi, napepele kuli Yehova ukuti mfwe fye ukucila ukushimikila. Umuku wa kubalilapo ukuya mu bunte bwa mu musebo, nafiseme mu mbali ya nshila, kabili nshalefwaya nelyo umo ukumona. Kuli pele pele amaka yaishilemo no kubuula magazini natambika ku walepita, awe apo pene ne fya kulanda fyaisa. Pali ubu bushiku, Yehova alingafwile ica kuti nalandile na bantu abengi pa lwe subilo lyandi ilya mu Baibolo.

“Ukutula lilya napapite myaka 12, kabili te mulandu no kuba umupiina lwa ku mubili, nalitemwa bupainiya kabili ncili ndeipakisha ubuseko bwakulisha ubwaba mu kushimikila icine ca Bufumu kuli bambi.”