“Kuti Twashibusha Shani AmaParishi Yesu?”

ABENGI tabengapapa ukumfwa ici cipusho icaipushiwe nomba line na magazini wa baKatolika ba ku France uwa Famille Chrétienne (Ulupwa lwa Bena Kristu). Shikofu Mukalamba Hume uwa ku Britain alandile fye no kuti amaparishi yaba “cipokapoka calaala.” Calitubululwa ukuti amabumba ya mu maparishi kuti yapwisha uku kushipula ukupitila mu kushimikila bambi. Umupatili umwina Italy atila ukucite fyo “kwaba kubile mbila nsuma mu kulungatika ukubomfya inshila shipya.” Nangu ca kuti nomba line papa akoseleshe imibombele ya musango yo, te bonse bamona ukuti balakabila ukushimikila bambi fintu basuminamo.

Nomba line lintu Pigi Perini, umupatili wa parishi ya ku Milan, aishile muno Afrika, umushimbe mwanakashi uwa fya mapepo amwebele ukuti: “Nalikala imyaka 40 muno Afrika, kabili nshilandanapo pe shina lya kwa Yesu pa kuti ningabakilila intambi sha bena Afrika.” Uyu mupatili asondwelela ati: “Twalileka ukulanda pa lwa kwa Yesu, twalileka ukwebako bambi pa lwa kwa Yesu, twalileka ukushimikila ilandwe!” Lelo kwaliba bambi abamona ukushimikila ngo kwacindama kabili nge nshila ya kubelamo abalola lwa ku mupashi. Pigi Perini asumina ukuti: “Nga mwamona abantu babili abalelanda pa lwa kwa Kristu pa mushiika, nelyo abakwete Baibolo mu minwe, mu mutima kuti mwatila: Shilya ni Nte sha kwa Yehova!”

Iminshipendwa ya bantu balaipakisha ukulanshanya Icebo ca kwa Lesa ne Nte sha kwa Yehova. Ukwabulo kutwishika na ku ncende kuntu mwikalila Inte shifwile shilalanshanya Baibolo na bantu. Nga fintu cali mu mwanda wa myaka uwa kubalilapo, aba Bena Kristu bapimpa balakoseleshanya ukwebako bambi fintu basuminamo. Ififulo uko balonganina (ifitwa Amayanda ya Bufumu) fyaba fifulo uko balangisha ukutemwa na bucibusa. Tulemulaalika ukwisa ku kulongana kwa Nte sha kwa Yehova no kwisamona ifyo mwingapwisha ukushipula kwa ku mupashi.