Ilyo ‘Umwela Ulefuma ku Ntanshi Yesu’

Ilyo Marko, kalemba we landwe alelondolola fintu abasambi ba kwa Yesu bacucutike mu bwato pa kucilinganya bemba wa Galili atile, “balecushiwa pa koba (pantu umwela walefuma ku ntanshi).” Ilintu Yesu ali ku lulamba lwa bemba, amwene abasambi bakwe balecula kabili mu cipesha amano aendele pa menshi ukulola kuntu baali. Ilyo aninine uko bali mu bwato, no mwela walinakile.—Marko 6:48-51.

Kalemba wa Baibolo umo wine mu kubangililako ashimike ukuti “kwaimine icikuuku ca mwela.” Apo pene, Yesu “akalipile umwela . . . , umwela walinakile, kwali no kukutama kukalamba.”—Marko 4:37-39.

Nelyo cingati ifipesha amano fya musango yu tatufimona pali ndakai, tulasambililako ifingi. Apo tuli bantu bashapwililika muli shino nshita shayafya, amafya kuti yatuponena. (2 Timote 3:1-5) Na kuba, limo limo kuti twayumfwa ukuti ukweshiwa kwesu kwaletako ubucushi ubukalamba nga nshi kwati fye cikuuku ca mwela. Nangu line ukwilulukwa kulabako! Yesu atulaalika ukuti: “Iseni kuli ine, bonse mwe bacucutika kabili abafinwa, na ine nalamupeelo kutusha.”—Mateo 11:28.

Lintu twamona ukuti ‘umwela ulefuma ku ntanshi yesu,’ kuti twakwata umutima “uwatekanya.” Mu nshila nshi? Ukupitila mu kucetekela amalayo ya kwa Yehova Lesa ayashifilwa.—Linganyeniko Esaya 55:9-11; Abena Filipi 4:5-7.