Cabalengele Bafwale na Kabili Inindaminwe

“LOLESHENI iminwe yandi. Bushe mwamonako ifili fyonse fimbi?” Umwaume umo atambike iminwe yakwe ku mwanakashi umo, uuli ni Nte ya kwa Yehova, uwaloleshe ku minwe kabili mu kwangufyanya amwene ukuti uyu mwaume tafwele inindaminwe ya bwinga. Alondolwele ukuti taleumfwana no mukashi, e co balipingwilepo ukulekana. Ulya Nte alandile ati: “Awe mwilekana! Sendeni ici citabo no kucibelenga. Cikafwilisha icupo cenu.” Na muli fyo, apeele uyu mwaume icitabo icashimpwa pali Baibolo ica Ukwishiba Uko Kutungulula ku Mweo wa Muyayaya.a

Pati papite inshiku shinono, ulya mwaume alibwelele kuli Nte ninshi nasansamuka. Amulangile ukuboko. Pali uno muku alifwele inindaminwe ya bwinga. Aebele Nte ukuti wene no mukashi balibelengele icitabo ca Ukwishiba no kuti pali nomba bali aba nsansa nga nshi. Cine cine, ici citabo cabalengele bafwale na kabili inindaminwe.

Ukufunda kwa mu Baibolo kuti kwaafwilisha umulume no mukashi ukutemwana icine cine. Ici ni pa mulandu wa kuti kalemba wa Baibolo aba ni Kabumba wesu, uusosa ukuti: “Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo.”—Esaya 48:17.

[Futunoti]