Bushe Mukasangwako Kuli Kalya Kashita Kaibela?

IMYAKA 3,500 iyapitapo, pa bushiku bushakalabwe, Yehova Lesa aebele abena Israele baali mu busha mu Egupti ukwipaya umwana wa mpaanga nelyo imbushi no kushinga umulopa wa iko pa filu na pa myalo ya mayanda yabo. Ubushiku bulya bwine, malaika wa kwa Lesa aliciliile amayanda ayakaninwepo umulopa lelo aipeye amabeli ayaume aya bena Egupti. Abena Israele lyene balilubwike. Cila mwaka pali bulya bushiku, abaYuda balasefya Ica kucilila.

Lintu Yesu Kristu apwishishe fye ukusefya Ica kucilila ca kulekeleshako na batumwa bakwe, atendeke umulalilo uwali no kulabomfiwa pa kwibukisha imfwa yakwe iya bulilambo. Apeele abatumwa bakwe umukate ushatutumuka no kutila: “Buuleni, mulye; uyu mubili wandi.” Kabili abapeele ulukombo lwa mwangashi no kutila: “Nwenimo bonse; pantu ulu mulopa wandi uwa cipingo cipya, uulesumina abengi ku kulekelelwe membu.” Yesu na kabili atile: “Citeni ici ku kunjibukisha.” (Mateo 26:26-28; Luka 22:19, 20) E co Yesu akambishe abakonshi bakwe ukulasefya icibukisho ca mfwa yakwe.

Uno mwaka ukusefya icibukisho ca mfwa ya kwa Yesu kukabako pali Citatu, pa April 19, cilya akasuba kawa. Inte sha kwa Yehova ukushinguluke sonde lyonse shikalongana pali ubu bushiku bwaibela ku kusefya Icibukisho mu nshila intu Yesu aebele. Mulelaalikwa nga nshi ukusangwako ku kumonako. Ipusheni Inte sha kwa Yehova ishabela kuntu mwikala pa kuti bamwebe inshita yalinga ne cifulo ca kulonganinako.