Afwilile Icishinte ca Mafunde

PE LIBWE lyalembwapo amashiwi ya ku mwibukishishako (ililangililwe pano) ilyasangilwe nomba line mu nkambi ya Sachsenhausen, iyali kale nkambi ya kucushiwilwamo, patendekelako amashiwi ayatila: “Twakulaibukisha August Dickmann (uwafyelwe mu 1910), uwali Nte ya kwa Yehova.” Mulandu nshi umo uwa Nte sha kwa Yehova engalembelwa pa libwe lya musango yu? Amashiwi yakonkapo e yalanda umulandu, yatila: “Bamupikile mfuti kuli ba SS ninshi bambi balemonako pa September 15, 1939, pa kukaana ukulwako inkondo pa mulandu wa fisumino fyakwe.”

August Dickmann apooselwe mu nkambi ya kucushiwilwamo iya Sachsenhausen mu 1937. Ilyo papitile nshiku shitatu ukutula apo Inkondo ya Calo iya Cibili yatendeke mu 1939, akambishiwe ukusaina akapepala ka kwingishishapo ubushilika. Lintu akene, umushilika mukalamba uwa nkambi alanshenye na Heinrich Himmler, uwali e mukalamba wa ba SS bonse, (Schutzstaffel, abali e bumba lyaibela ilya balinshi ba kwa Hitler), no kulomba insambu sha kwipaya Dickmann ninshi na bonse abali mu nkambi balemonako. Pa September 17, 1939, inyunshipepala ya The New York Times iyalembelwe ukufuma ku Germany yatile: “August Dickmann, uwa myaka 29, . . . kuno napikwa imfuti ku bashilika.” Inyunshipepala yatile ali e mwina German wa kubalilapo ukukaana ubushilika pa mulandu wa fisumino fyakwe.

Pa September 18, 1999, ninshi napapita imyaka 60, akabungwe ka Brandenburg Memorial Foundation kaibukishe mfwa ya kwa Dickmann, kabili ilibwe lyalembwapo amashiwi ya kumwibukishishako pali ndakai licinkulako abatandashi pa lwa kushipa kwakwe ne citetekelo cakosa. Ilibwe lya cibili ilyalembwapo amashiwi ya kwibukishishako bambi ilyaba pa cibumba ca ku nse ica yali kale nkambi, licinkulako abatandashi ukuti te Dickmann eka aculile lelo kwali nalimo Inte sha kwa Yehova 900 abaculile mu nkambi ya Sachsenhausen pa mulandu wa fisumino fyabo. Abengi na bambi baliculile mu nkambi shimbi. Abengi tabatobele ifishinte fya kwa Lesa nangu cingati baliculile nga nshi mu nkambi sha kucushiwilwamo.

Inte sha kwa Yehova shalishiba ukuti Abena Kristu balingile ‘ukunakila bakateka abacilamo.’ (Abena Roma 13:1) Nangu cibe fyo, lintu amabuteko yabapatikisha ukutoba amafunde ya kwa Lesa, bakonka ica kumwenako ca batumwa ba kwa Kristu, abatile: “Tuli no kunakila Lesa ukucilo kunakila abantu.” (Imilimo 5:29) E mulandu wine Inte sha kwa Yehova mpanga yonse bakonkelela umutende, nge fyacitile August Dickmann, muli cino calo caisulamo ukupatana kwa mishobo ukwalenga kube ubukalushi ubwabipisha. Bomfwila ukukonkomesha kwa mu Baibolo ukutila: “Wicimfiwa ku bubi, lelo ucimfishe ububi mu kucite cisuma.”—Abena Roma 12:21.