Abafyashi Bakaanya Impatila ya kwa Kafundisha

Kafundisha umo uwa pe sukulu lya ku praimari mu Cassano Murge, ku Italy, apeele bamo aba bana ba pa sukulu utupepala twa kukambatika ukuti bengatwala ku ng’anda. Utu tupepala utwali no kukambatikwa pa ciibi ca ku ntanshi, twalembelwepo kuti: “Tupepa ku Katolika. Inte sha kwa Yehova tashilingile ukukonkonsha pali ici ciibi.”

Abafyashi bamo aba bana ba pe sukulu ili, nangu cingati te Nte sha kwa Yehova, tabasuminishe nangu panono imicitile ya kwa kafundisha. Ukulingana ne nyunshipepala ya Muoviti Muoviti, abafyashi balandile ukuti ‘ukweba abana amashiwi ya musango yu kulalenga abana ukukanaumfwa ku uli onse ushitontonkanya nga bena nelyo ukuitalusha ku muntu pa mulandu wa “kupusana” mu mipepele.’ Umufyashi umo uwalembele ku nyunshipepala aitile tulya tupepala pamo nge “nseke sha mankumba, kabili pamo nge ca kufumamo ca bumbuulu no bupumbu.”

Ukulingana na fintu uyu lipoti alangilila, abantu abengi abashaba no lupato balimona mafya yaba mu kulundulula impatila. Kabili balicindika fye no butumikishi bwa Bwina Kristu ububombwa ne Nte sha kwa Yehova mu Italy e lyo na mwi sonde fye lyonse. Tulemulaalika ukukanapelela fye mu kukaanya impatila lelo ukwipusha ne Nte sha kwa Yehova pa lwa ‘kucetekela ukwaba muli bene.’ Bakaba aba nsansa ukulanshanya na imwe pa lwa cene, mu “katiina.”—1 Petro 3:15.