Ukuba Aba Bucishinka Kuli Yehova

NANGU line bucishinka tabwaseeka ilelo, bwaba mibele, iishibisha ababomfi ba kwa Lesa wa cine, Yehova. Umuntu wa bucishinka alashangila mu fya kwesha ukwabula ukutelententa te mulandu ne nshita ingapitapo. Tontonkanyeni pa Mfumu isuma Hisekia. Baibolo itila: “Pa numa yakwe takwali nga wene uwa mu shamfumu shonse sha bena Yuda, nangu ni pa shamutangilile.” Cinshi calengele Hisekia ukuibela? “Alambatile kuli Yehova,” nangu cingati ashingulwikwe na bakapepa ba kwa Moleki, umulungu wa bufi. Ca cine, Hisekia ‘taalwike mu kukonka [Yehova], lelo alebaka amafunde yakwe.’—2 Ishamfumu 18:1-6.

Umbi uwali uwa bucishinka kuli Yehova ali mutumwa Paulo. Ilyashi pa lwa butumikishi bwakwe ilisangwa mu Malembo ya Bwina Kristu aya ciGriki, lilashinina ukwabula no kushako ukuti Paulo ali uwa bucishinka mu mulimo wakwe uwa mweo onse kuli Lesa. Ilyo ali mupepi no kufwa, Paulo aliisosele ukuti: “Nimpilikito kupilikita kusuma; nimpwisho lubilo; nimbake citetekelo.”—2 Timote 4:7.

Mwandi Hisekia na Paulo baba fya kumwenako fisuma ifya bucishinka ifyo twakwata! Shi natupashanye icitetekelo cabo pa kuba aba bucishinka kuli Lesa wesu Uwakulisha, Yehova.—AbaHebere 13:7.