Mulandu Nshi Uwa Kubelela Uluse?

INYUNSHIPEPALA iya ku Canada iya The Toronto Star yacitile lipoti ukuti: “Basayantisti balimya ukusapika ukwatendeka ukulangisha ukuti ukubelelo luse kulawamyako inkuntu, e lyo no butuntulu bwa bumi.” Lelo, Profesa Carl Thoresen uwa ku Yuniversiti ya ku Stanford, mu U.S.A. uutungulula uku kusapika ukwa Stanford Forgiveness Project, atile: “Banono abaumfwe icaba ukulekelela kabili na cintu kucita.”

Ukulekelela kwa cine cine kwalimonwa ukuba icintu cakatama mu BuKristu. Lipoti wa The Toronto Star, alondolwele ukuti ukulekelela kwaba “kwishiba ukuti naubifiwa, ukuleka ukukalifiwa ukwaimako, kabili mu kukonkapo ukulaumfwana no umubifishe mu cikuuku nangu fye mu kutemwa.” Cifwile ukupusanako no kutekelesha icilubo, ukufwaya umwa kulesesha, ukucilabako, atemwa ukukane co cilubo; kabili tacipilibula ukubwelela mu kusaalulwa kabili. Iyi lipoti yasosa ukuti icafwa mu kulekelela kwa cine cine caba “kuleka ubukali no kuyumfwa uwabipilwa.”

Incenshi shisosa ukuti ukufwailisha kwalundwako kulefwaikwa pa kushininkisha ukumwenamo kwa ku mubili ukufuma ku kulekelela bambi. Nangu cibe fyo, balalanda pa lwa kumwenamo mu matontonkanya, ukusanshako “kukanaba no kukanshika, ukukanasakamikwa no kupopomenwa.”Umulandu uwakulisha uwa kubela ulekelela walilondololwa pa Abena Efese 4:32 apatila: “Mubelane icongwe, mube aba mitima ya nkumbu, ababelelano luse, ifyo na Lesa amubelele uluse muli Kristu.” Ukulosha ku kulekelela, kwati ni mu mbali shimbi, twalicincishiwa ukuba abapashanya Lesa.—Abena Efese 5:1.

Ukukaana ukulekelela bambi ilyo no mulandu wa kubabelela uluse e po uli kuti cayambukila bubi bubi ukwampana kwa pa lwesu na Lesa. Yehova enekela ifwe ukulekelelana. E lintu na ifwe twingapepa ukuti Yehova atubelele uluse.—Mateo 6:14; Marko 11:25; 1 Yohane 4:11.