Isambililo Kuli Kensha wa Ngalaba

UKWENSHA ingalaba weka pali bemba kuti kwaba ukwa kunasha. Ukunaka kuti kwalenga kensha wa ngalaba ukulufyanya ukupingulapo ifya kucita. E mulandu wine acindikila umulimo wa nanga. Kensha wa ngalaba uunakile emikila ingalaba ku nanga pa kuti e ngatuushako no kubwesha amaka ukwabula ukusensenunwa bubi bubi. Pa nshita imo ine, inanga ilenga icisolo ca ku ntanshi ya ngalaba ukulola ukulefuma umwela na mabimbi kabili ici cilenga ubwato ukuba ubwashikatala.

Nga fintu fye bakensha wa ngalaba balolenkana ne fingi ifyabipa pali bemba, Abena Kristu balolenkana no kutitikisha kwa lyonse ukwa cino calo kabili balafwaya ukutuusha. Na kuba, inshita imo Yesu akoseleshe abasambi bakwe ukuti: “Iseni imwe bene ku mbali ukwaba amatololo, no kutusha panono.” (Marko 6:31) Lelo, bamo kuti basendako imilungu iinono ukuya pa lwendo nelyo ukuyakokolokako no lupwa lwabo pa mpela ya mulungu. Inshita sha musango yu kuti shaba isha kupembesula kabili isha kukosha. Lelo kuti twashininkisha shani ukuti tuli abacingililwa lwa ku mupashi pa nshita sha musango yu? Cinshi cingaba nge nanga yesu iya pali bemba iya ku mupashi ku kutwafwa ukukanasensenunwa no kutwalilila ukushikatala lwa ku mupashi?

Yehova alitupayanishisha ica kutwafwa. Caba Cebo cakwe ica Mushilo, Baibolo. Nga tuleibelenga cila bushiku, kuti twatwalilila ukupalamina kuli Yehova no kukanasensenunwa ukufuma kuli wene. Ukufunda kwa iko kuti kwalenga twashikatala no kulenga tuleshipikisha amesho ya kwa Satana ne calo cakwe. Ukutwalilila ukukonka programu wa kubelenga Baibolo lyonse, na lintu fye te pa nshita twatantika, kuti kwatulenga ukushikatala lwa ku mupashi.—Yoshua 1:7, 8; Abena Kolose 2:7.

Kemba wa malumbo atucinkulako ukuti “[wa nsansa, NW] umuntu” uyo “mu malango ya kwa Yehova e mwabo kubekwa kwakwe, ne fili mu malango yakwe afitontonkanya akasuba no bushiku.” (Amalumbo 1:1, 2) Ukubelenga Icebo ca kwa Lesa cila bushiku kukatuletela “insansa” shaba mu kupembesulwa cine cine no kukoshiwa, ukuba abaipekanya ukutwalilila mu Bwina Kristu.