Ilyo Ukwikala Tondolo Kuba Kusuminishako

ICITABO icitwa Betrayal—German Churches and the Holocaust cilondolola apabuuta ifyo imipepele yaibimbile mu fya bupolitiki fya Nazi. Ici citabo citila, “Abena Kristu baleafwilisha ubu buteko, kabili abengi bafililwe ukukaanya ukupakasa kwa baYuda. Na muli ifyo ukwikala tondolo, kulasosa ifingi.”

Cinshi calengele abaitunga ukuba Abena Kristu ukutemwa ubuteko bwa Nazi? Icitabo cilondolola ukuti, “abengi balibelelekwe ku mafunde yantu Hitler abikiile abekashi ba mu Germany.” Kabili calundapo ukuti: “Alikeenye ifitabo filangisha ifye shiku, ubwamba, bucilende, ukuponya amafumo, ukulaalana kwa baume beka beka nelyo abanakashi, ne fye ‘shiku’ fyaba mu fisela ne fyangalo fya muno nshiku, kabili alepela ifilambu fya bronze, silfere, na golde ku banakashi abakwete abana ukutendekela pali 4 ukufika pali 8, ukubakoselesha ukutwalilila ukubomba imilimo yabo mu ng’anda. Ukucindika ifishilano, ukulundako na fintu alebomba na bo abaseebenye icalo cakwe mu cipangano ca Versailles Treaty, kwalengele abengi mu Germany, ukulundako fye na Bena Kristu, ukutemwa ubu buteko.”

Ibumba lya bantu limo lyaliibelele icine cine. Icitabo citwa Betrayal cilanda ukuti, “Inte sha kwa Yehova, bakeene ukuyobeka mu lukaakala nelyo ukubomfya ifyanso fya nkondo.” Ici calengele aka kalibumba ka bantu ukusanswa, kabili abengi pali aba batwelwe mu nkambi sha kucushiwilwamo. Lelo bambi abaleitunga ukuba abasambi ba kwa Yesu balitwalilile ukuba abashipa. Ukulundapo, ici citabo citila: “BaKatolika na baProtestanti bali aba bukalushi ukucila ukuba aba cikuuku ku Nte sha kwa Yehova, kabili ukupala Hitler, balitemenwe ulukaakala nga nshi ukupusanako ne Nte sha kwa Yehova abalefwaya icibote.” Pa mulandu wa kwikala tondolo ukwa iyi mipepele, Inte sha kwa Yehova balicitilwe akantu icine cine ku buteko bwa Nazi.

Ilyo ukubimbwa kwa macalici mu mapolitiki ya Nazi kutwalilila ukuba lyashi lya kukansaninapo, icitabo ca Betrayal citila Inte sha kwa Yehova “bakeene ukusuminishako nelyo ukubombela pamo na bulya buteko.”