Ukutemwa kwa Bwina Kristu Te Kwa pa Kanwa Fye

ILYO ing’anda yabo yapiile, ulupwa lwa ba Bartholomew ulwa ku Trinidad lwalufishe fyonse ukufumyako bena beka. Lupwa lwabo uwaleikala mupepi alibetile ukuti bekale nankwe, lelo apo, te po fyonse fyapelele.

Ba Olive Bartholomew ni Nte ya kwa Yehova, kabili abanabo mu cilonganino ukulundako na ba mu filonganino fyabela mu ncende sha mupepi batendeke ukupeela umusangulo pa kutila bengakuula ing’anda intu uyu nkashi na bana bakwe balufishe. Komiti wa kutungilila ulya mulimo alipangilwe, kabili ubukuule bwalitendeke. Inte mupepi na 20, e lyo na bena mupalamano balisangilweko. Abacaice na bo balibombeleko, ilyo bambi balepekanya utwa kulya.

Ukulingana na fintu inyunshipepala ya ku Trinidad iya Sunday Guardian ilondolola, bankashi Olive abatile, “ulupwa lwandi nalupeshiwa amano icine cine, tabali Nte, kabili abalume bandi bacili abapapushiwa pa kumona ifilecitika.”

Ilyo uyu mulimo walepwishishiwa, kampanya wa bukuule asosele ukuti imilimo ya musango yu e fiishibilo fya Bwina Kristu bwine bwine. Atile, “tatuya fye ku ng’anda ne ng’anda mu kulanda pa kutemwa, lelo tulesha ukucita ifyo tushimikila.”—Yohane 13:34, 35.

[Icikope pe bula 32]

Ba Olive Bartholomew na bena mwabo