“Ica Kumwenako Ukwikatana”

UYO e wali umutwe wa cipande cimo icasabankanishiwe mu nyunshipepala ya mu Indaiatuba, mu São Paulo, ku Brazil. Ni bani bali ica kumwenako? Kalemba alondolwele ati: “Inte sha kwa Yehova, abapaanga ukukuula ‘Ing’anda ya Bufumu’ iipya, nga fintu amatempele nelyo ifiyanda fyabo fiitwa, balangishe ica kumwenako cine cine ica kumfwana ico tushingasuulako fye.”

Ukwikatana kwaba pa kati ka Nte sha kwa Yehova kulamonekesha mu nshita sha musango yu. E mulandu wine icipande casosele ukuti: “Cilafika pa mutima ukumona abaume, abanakashi, na bapungwe balebombela capamo mu kuitemenwa ilyo balekuula icikuulwa ca kulonganinamo no kupepa Lesa.”

Inte sha kwa Yehova shilalangisha ica kumwenako cisuma na mu milandu imbi. Icipande casanshishepo ukuti: “Ukulunda pa kusambilila no kupepa, balafwaisha ukupindulula abakunkuma ku bwalwa na bakunkuma ku miti ikola no kulanga abantu ifyo bengekatana no kutemwana.” Bacita shani fi? Inte sha kwa Yehova shalishiba ukuti ukusambilila no kukonka ukufunda kwa Baibolo kuti kwayafwa umuntu ukuputukako ku bubifi. E mulandu wine batukutila ukusambilisha bambi ifyo basambilila ukufuma mu Baibolo. Icipande casondolwele ukuti, “ukwabula ukutwishika, ica kumwenako cabo cena cilingile ukukonkwa mu kwangufyanya.”

Uuli onse kuti asangwako ku kulongana kwa Nte sha kwa Yehova kabili tabasonkesha mituulo. Mulelaalikwa ukuyako ku Ng’anda ya Bufumu iyabela mupepi na kuntu mwikala.