“Icintu Icifwile Ukuleta Ubuseko Kuli Bonse”

TUVALU, icalo cayemba ica mu South Pacific icapangwa ne fishi 9, cakwata abantu nalimo 10,500. Nangu cibe fyo, pa kwishiba ukuti Lesa ‘afwaya abantu bonse ukupusuka no kufika ku kwishibe cine,’ Inte sha kwa Yehova isha ku Tuvalu shalefwaisha ukukwata impapulo sha Baibolo mu lulimi lwabo. (1 Timote 2:4) Ici calyafishe pantu takwali dikishonari muli ulu lulimi. Mu 1979, mishonari uwa Nte sha kwa Yehova uwalebombela mu Tuvalu atendeke ukubombelapo pali ubu ubwafya. Wene no mukashi wakwe baikele no lupwa lwa ku Tuvalu, basambilile ulu lulimi, kabili mu kupita kwa nshita balipangile dikishonari uwali na mashiwi ya mu ciTuvaluan. Ilyo calefika mu 1984, Watchtower Bible and Tract Society of New York yalisabankenye icitabo ca Kuti Waikala Kuli Pe na pe muli Paradise Pe Sonde mu ciTuvaluan.

Incenshi, ba T. Puapua, abali inkonkani kuli kateka mu Tuvalu, balembele kalata wa kutasha pa citabo ca Ikala Kuli Pe na pe. Balembele ukuti: “Ici citabo cintu cimbi icipya kabili icacindamisha icalundwa ku ‘fyuma’ fyaumo mutengo ifya Tuvalu. Mufwile ukuba ne nsansa sana pa mulimo mubombele, umulimo uwacindama mu kukuula bumupashi bwa bantu ba muli cino calo. Ndesubila uyu mulimo ukalembwa mu malyashi ya fyalecitika mu Tuvalu ukulosha ku kupulinte fitabo fya kusambililamo. . . . Uyu mulimo mubombele cintu icifwile ukuleta ubuseko kuli bonse.”

Amashiwi kapilibula alonganike yalengele ukuti dikishonari iyakwata amashiwi ya ciTuvalu ayapilibulwa mu ciNgeleshi isabankanishiwe mu 1993. Yaali e dikishonari ya kubalilapo ku cintubwingi muli lulya lulimi. Nomba line fye, ba National Language Board of Tuvalu balombele insambu sha kubomfya iyi dikishonari pa kupanga dikishonari wabo uwa kubalilapo mu lulimi lwa cikaya.

Ukutula pa January 1,1989, Ulupungu lwa kwa Kalinda Ulufuma lumo cila mweshi lulasabankanishiwa mu ciTuvaluan. Nga ca kuti mulebelenga uno magazini mu lulimi lushili lwenu, bebeteni ibula 2 mumone nga ca kuti ululimi lwenu nalusanshiwamo mu ndimi isho Ulupungu lwa kwa Kalinda lusabankanishiwilwamo. Ukulubelenga mu lulimi lwenu cine cine kuti kwamuletela ubuseko bwalundwako.