Bushe Muli Umutende mu Myaka ya ba 2000?

KWALI ukwimika no kusefya Umwaka wa pa kati ka Fyalo uwa Bwikashi bwa Mutende mu Paris na mu New York City pa September 14, 1999. Uyu mwaka wabililwe ne Cisaka Cikalamba ica United Nations ukukuma ku mwaka wa 2000. Federico Mayor, uwali kale umukalamba waleangalila akabungwe ka [United Nations Education Scientific and Cultural Organization (UNESCO)], alombele ukuti “akabungwe ka mu calo conse aka kuleta ubwikashi bwa mutende no kupwisha ulukaakala kapangwe.”

Ba UNESCO bakwata icishinte cisosa ukuti “apo inkondo shitendekela mu mintontonkanya ya bantu, inshila sha kubakililamo umutende shifwile ukutendekela mu mintontonkanya ya bantu.” Mu kumfwana naya mashiwi, aka akabungwe kalefwaya ukupanga ubwikashi bwa mutende ukupitila mu “kusambilisha, ukulanshanya no kubombela pamo.” Mayor atile tacakumanina “ukuba fye aba mutende, nangu ukuba fye abashitungilila inkondo, lelo tulingile ukuba bakapanga ba mutende.”

Ku ca bulanda, umwaka wa 2000 tawali uwa mutende nangu fye panono. Ifyacitika muno nshiku ne fyacitike mu mwaka wa 2000 filangilila ifyo umuntu aafilwa ukulesha inkondo no lukaakala te mulandu no kweshaesha kwafumaluka ukwa kufwaya ukucite fyo.

Lelo, cili bwino ukwishiba ukuti umutende cine cine fyendela pamo no kusambilila. Imyaka nalimo 2,700 iyapitapo, kasesema Esaya asobele ukuti: “[Abana, NW] bobe bonse bakaba abasambilishiwa kuli Yehova, kabili umutende wa bana bobe abaume ukafula.” (Esaya 54:13) Kasesema umo wine amwenene kabela inshita lintu abantu ukufuma ku nko shonse bali no kukonkomokela ku kupepa kwasanguluka ukwa kwa Yehova Lesa ku kusambilila imibele Yakwe. Cinshi catumbukamo? “Bakasuke abafule mpanga shabo shibe ifya kuliminako umushili, na mafumo yabo yabe ifya kutungwilako imiti; lukasuke uluko alubulo kusumbwilo lupanga ku luko, nangu kusambilila kabili ubulwi.” (Esaya 2: 2-4) Pa kumfwila uku kusesema, Inte sha kwa Yehova balabomba umulimo wa kusambilisha mwi sonde lyonse uwayafwilisha iminshipendwa ya bantu ukutaluka ku kupata abantu ba mu fyalo fimbi ne mishobo ukwaletako inkondo ishingi.

Inkondo shikapwa mu kuteka kwa Bufumu bwa kwa Lesa, ubukaleta umutende no mutelelwe ifibelelela kwi sonde. (Amalumbo 72:7; Daniele 2:44) Lyene, yakafishiwapo amashiwi ya kwa kemba wa malumbo aya kuti: “[Moneni] imilimo ya kwa Yehova, ifyo acito kupomona mu calo: aputulo bulwi ukufika ku mpela ya calo.”—Amalumbo 46:8, 9.