Ifyo Basengauka Ukukonkelesha Bambi

UKUFWAISHA ukutemwikwa kulalenga abengi ukukonkelesha ifyo ifibusa fyabo fitontonkanya ne fyo ficita. Abacaice e bakabila sana ubukose bwa kukanaba ne fibelesho fyabipa, pamo nga ukubomfya imiti ikola na bucisenene. Ni shani fintu bengasengauka ukukonkelesha bambi?

Abakashana babili abapungwe ba ku Poland nomba line fye balembele ukuti: “Umupashi wa calo ulamoneka nga nshi mu fibusa fyesu ifingi. Balabepa pa mashindano ya ku sukulu, balande fye shiku, kabili batemwa imifwalile yabipa ne nyimbo shabipisha, isha bucisenene. Fintu tuli aba nsansa ukuti twalikwata ifipande ifilembelwa fwe bacaice kabili ifitucingilila ku kusonga kwa bapungwe abashitekanya pa filecitika kabili aba bucipondoka!

“Kuti cayafya ukulondolola ifyo tutasha pa fipande fya mu Ulupungu lwa kwa Kalinda ifyatwafwilisha ukumfwikisha ukuti fwe bacaice tulakabilwa kabili twalitemwikwa. Ukufunda kwa muli Baibolo uko twapokelela kwalitwafwilisha ukwenda bwino pa kuti tutwalilile ukutemuna Yehova Lesa. Natushininkisha ukuti ukubombela Yehova ne cishinka e mikalile yawamisha mu bumi.”

Ca cine, abacaice kuti basengauka ukukonkelesha bambi. Ukupitila mu kukansha “ukulingulula” kwabo, abacaice Abena Kristu balasambilila ifyo bengacita ukupingulapo kwa mano ukushilangisha “umupashi wa pano isonde” kano “umupashi uwafuma kuli Lesa.”—AbaHebere 5:14; 1 Abena Korinti 2:12.