Bushe Ukucincintila Ubupiina Te Kuti Kucitwe?

ABATANDASHI baya ku cisaka ca United Nations ku New York City balamona Icikuulwa ca ba Economic and Social Council, kabili mu mutenge wa ici cikuulwa ca cintubwingi mulamoneka imipaipi ne ntambo sha malaiti ne sha mafoni. Uwa kutandasha abeni alondolola ukuti: “Umutenge ‘uushapwa’ umonwa nge cakucinkulako ukuti umulimo wa ba United Nations uwa fya bunonshi ne fya mu bwikashi taupwa; lyonse fye kulabako ifya kucita ku kuwamya imikalile ya bantu mu calo.”

Nangu ca kuti ici Cipani caliipeelesha ku mulimo usuma uwa kuwamya imikalile ya bantu bonse, uyu mulimo umoneka ngo ushipwa. Lelo, mu butumikishi bwakwe ubwa pe sonde mu mwanda wa myaka uwa kubalilapo C.E, Yesu Kristu atile: “Umupashi wa kwa Shikulu waba pali ine, pantu ansubile ku kubile mbila nsuma ku babusu.” (Luka 4:18) Ni “mbila nsuma” nshi abilile? Yali bukombe pa lwa Bufumu ubo Yehova Lesa, uubela “umubusu ukwa kushina mu kumanama,” akemika na Yesu Kristu nge Mfumu ya buko. Cinshi ubu Bufumu bukacita? Esaya asobele ukuti: “Yehova wa milalo akacitile nko shonse umutebeto wa fya mafuta, umutebeto wa myangashi ya pa fisekwa, ifya mafuta ifyaisulamo ubufyompo, imyangashi ya pa fisekwa iyalengululwa; akamine mfwa ukumina kwa pe. Shikulu Yehova akafuuta ne filamba pa finso fyonse.”—Esaya 25:4-6, 8.

Bushe kuti mwatemwa ukwishibilapo na fimbi pa fyo Ubufumu bwa kwa Lesa ‘bukawamya imikalile ya bantu mu calo,’ ica kuti tamwakabe no kubulisha? Moneni amashiwi yali pe samba ku kwishiba ifyo kasambilisha wafikapo engamutandalila ku kumulanga na fimbi ifyo Baibolo ilanda pa fya musango yo.