Bushe Kuti Mwaba Aba Nsansa Icine Cine?

PA KUPOSHA umuntu onse ba George balemwentula. Ba George bamwene ubumi ngo bupe bwa mutengo ubo umo engaipakisha. Insansa no kwenekela ifisuma cali e ca kubeshibilako—ukucilisha ilyo batendeke ukucula mu myaka ya bukote bwabo. Ukufikila ubushiku bafwile, ba George baishibikwe ukuba umuntu uwa nsansa. Bushe mwaba ne nsansa kwati ni ba George? Bushe mulamona ubushiku bumo na bumo ubupya ukuba ubupe ubo mwingaipakisha? Nangu bushe ukwenekela ukwa bushiku bumo na bumo ubupya kulamulenga ukukanayangwako nelyo fye ukusakamikwa? Bushe kuli icilemupusula insansa?

Insansa shalondololwa ngo kwikala bwino pa nshita yatantalilako. Insansa shishibikilwa ku nkuntu pamo nga ukuwama kwa fintu ukufika na ku kuba uwasekelela kabili mu cifyalilwa ukufwaya ukwikala bwino. Bushe insansa sha musango yo eko shaba?

Pali lelo, ubwikashi bukoselesha abantu ukumona ukuti ukukwata ifyuma e kulete insansa. Abengi balapamfiwa ukubombesha pa kufwaya ukuba abakankaala. Mu kucite fyo, abengi balaipusula ifibusa ne fintu fimbi ifikalamba mu bumi. Kwati tunyelele mu culu, lyonse baba abapamfiwa, kabili baba ne nshita iinono iya kutontonkanya pa fyo bacita nelyo iya ukutontonkanya pali bambi. Ca cine, ilyashi lya muli nyunshipepala ya Los Angeles Times lyashimike ukuti “abantu abo balepima ukuti baba abapopomenwa balefula, kabili impendwa ya balecula no kupopomenwa bali mu mushinku wa bwaice. . . . Imiti ya kunashako kupopomenwa ili e miti amakampani yashitisha imiti balepangilapo indalama.” Abengi balanwa imiti ikola atemwa balafwaya ukupwisha amafya yabo ukupitila mu kunwa ubwalwa. Bambi nga bapopomenwa balayobeka mu kushita ifintu icishiteshite. Mu kusapika kumo ukwa mu Britain Inyunshipepala iya The Guardian yatile, “abanakashi e batemwa sana ukuya mu kushita ifya kushitashita nga bapopomenwa. Abanakashi abaleshita ifya kushitashita nga bapopomenwa bacilile abaume abalecite co imiku itatu.”

Lelo, insansa sha cine cine te kuti shisangwe mwi tuka, mu kunwa umwangashi, ukunwa umuti, ukulaswa nshindano ya mu cipatala, nangu mu ndalama sha ku banki. Insansa tabashitisha; bapeela fye. Ni kwi twingasanga ubu bupe bwa mutengo ifi? Tuli no kulanda pali ico mu cipande cikonkelepo.