Bushe Imipepele Ikaletako Umutende Mwi Sonde lyonse?

ABEMINISHI ukucila 500 ukufuma ku fyalo 73 babungene mu New York City ukufuma pa August 28 ukufika pa 31, 2000. Babunganine pa United Nations ku “Kukumana kwa Mutende wa mwi Sonde Lyonse Ukwa Ntungulushi sha Mipepele Kabili Isha ku Mupashi.” Ishi Ntungulushi—ishafwele ifisote, imingila ya kashikila, ififimbo fya masako, ne mingila iitali iyafiita—shaiminineko ifisumino ifingi. Pali ifi fisumino pali baBaha’i, abaBuddha, abaHindu, abaShilamu, abaShinto, abaSikh, abaTao, abaZoroaster, ne mipepele ya Kristendomu.

Abasangilweko babunganine pa United Nations pa nshiku shibili isha kubalilapo pali kulya kukumana kwa nshiku shine. Lelo, uku kukumana takwateyanishiwe na ba United Nations kabili tebafumishe indalama ishabomfiwe lelo utubungwe twalekanalekana utwafwilisha mu kubungana kwa musango yo e twafumishe indalama. Lelo, bonse ba United Nations na bashimapepo balandile pa bucindami bwa kubombela pamo ku kupwisha ubupiina, akapaatulula ka nkanda, amafya ayakuma ifilengwa na Lesa, inkondo, ne fyanso fikalamba ifingalofya ubumi.

Abasangilweko basaine ulupapulo lwaleti “Ukuipeelesha ku Mutende wa mwi Sonde Lyonse.” Nangu basumine ukuti ulukaakala ne nkondo “inshita shimo ficitilwa mwi shina lya mipepele,” ulu lupapulo lwatile abasaineko bali no “kubombela pamo na United Nations . . . mu kukonkelela umutende.” Lelo, takwali ukusuminishanya pa fyo ici cingacitwa.

Pa bushiku bwa cibili ubwa kukumana, Bawa Jain, kalemba mukalamba uwa uku kukumana, ilyo alepwisha amashiwi yakwe aya kwiswila alondolwele ukuti imyaka imo mu kubangilila amwene icikope cimo pa United Nations. Pali ci cikope pali umuntu umutali ukucila icikulwa ca ba United Nations Secretariat. Alekonkonsha pali ici cikuulwa kwati ni pa ciibi. Pe samba lya ici cikope pali amashiwi yaleti: “Cilolo wa Mutende.” Jain atile: “[Icikope] calinkumine sana ilyo fye nacimwene.” Nalipwishe abantu abengi ifyo calepilibula. Ndemona kwati lelo ninkwata icasuko. Ukubungana kwenu bonse pano, mwe ntungulushi sha ku mupashi kabili isha mipepele yaba mu calo, kulenanga ukuti [uyu] e cilolo wa mutende uulekonkonsha pa ciibi ca United Nations.”

Baibolo isambilisha ifyapusanako. Ilangilila ukuti Cilolo wa Mutende ni Yesu Kristu. Takalete umutende wa mwi sonde lyonse pa kubomfya intungulushi sha mapolitiki nelyo isha mipepele, lelo akabomfya Ubufumu bwa kwa Lesa. Ubu Ubufumu—ubwaba buteko bwa kwa Lesa ubwa mu muulu—e bukekatanya abantunse ba cumfwila no kulenga ukufwaya kwa kwa Lesa ukucitwa pe sonde.—Esaya 9:6; Mateo 6:9, 10.