“Icintu Cafisama ico Cingonaula Ubumi bwa Bantu”

UKUSAPIKA kwa nomba line pa lwa fikope fya kulala kwa mwaume no mwanakashi ifiba pa Intaneti kwasokolwele ukuti, ca kupapusha ukuti pa bantu batatu abakalamba ababomfya Intaneti mu United States umo pali aba alatamba ifikope fya kulala kwa mwaume no mwanakashi ifyaba pa Intaneti. Abantu abengi nomba balekonkelela insuuna yabo ukupitila mu kubomfya Intaneti. Dokota Al. Cooper, uwasambilila ifya muntontonkanya uwacitile uku kusapika atile: “Ici cintu cafisama ico cingonaula ubumi bwa bantu icilekula nga nshi, no mulandu umo wa kuti banono baleiluka ukuti e fyo caba nelyo banono balemona ukuti mulandu wakakala.”

Ni bani maka maka bengasongwa ku fikope fya kulala kwa mwaume no mwanakashi ifya pali Intaneti? Dokota Cooper atile: “Ni balya ababomfya Intaneti aba kuti mu bumi bwabo bonse kwaba ifintu fyabalesha ukukonkelela insuuna yabo” lelo abo “bapulikilwa ku fikope fishaifulila ifya kulala kwa mwaume no mwanakashi” ifyaba pa Intaneti.

Lelo, abengi abatamba libili libili ifikope fya kulala kwa mwaume no mwanakashi pa Intaneti bamona ukuti ici tacalubana. Bushe e fyo caba? Nga filya fine umuntu engakunkuma ku miti ikola iyo alebomfya, abengi abakunkuma ku fikope fya kulala kwa mwaume no mwanakashi ifya pali Intaneti bafwaya ifikope fya musango uyu “ifileya fileluminako” pa kuti bekushe insuuna yabo. Ne ncito kuti yapwa pamo ne cupo cabo cine!

Lelo, abafwaya ukutemuna Lesa balikwata umulandu na umbi uwa kutalukila ku kutamba ifikope fya kulala kwa mwaume no mwanakashi ifyaba pali Intaneti. Icebo ca kwa Lesa cikonkomesha ukuti: “E ico mulenge fifwe ifya filundwa fyenu ifya pano nse: ubulalelale, ukukowela, umufimbila, ulwinso, bucilende, ulunkumbwa e kupepo tulubi, muli ifyo mwishilo bukali bwa kwa Lesa pa bana ba bucintomfwa.” (Abena Kolose 3:5, 6) Pa kuti umuntu alenge ‘fifwe ifya filundwa fyakwe’ ukukuma ku nsuuna yakowela, umuntu alingile ukutemwa sana Yehova Lesa. (Amalumbo 97:10) Nga ca kuti amona ukuti alebelelekwa ku cintu cafisama ico cingonaula ubumi bwa bantu ica pali kompyuta, alingile ukukosha icitemwiko akwatila Yehova ukupitila mu kusambilila Icebo ca kwa Lesa, Baibolo. Ukubishanya kusuma ne Nte sha kwa Yehova pa Ng’anda ya Bufumu kuti kwayafwa sana umuntu mu kupingulapo kwakwe ukwa kutemuna Lesa.