Bushe na Imwe Mufwile Ukusambilila Baibolo?

“TE KWESHA ukuibelenga mweka apabula umupatili.” Uku kusoka kusangwa mu mashiwi ya kutendekelako aya mu maBaibolo yamo yamo aya baKatolika. Kay Murdy, uwa ku Catholic Bible Institute ku Los Angeles, atila: “Fwe baKatolika tatwakoseleshiwa sana ukuibelengela Baibolo, lelo pali nomba ifintu fileyaluka.” Atila, ilyo baKatolika baishiba ifyo Amalembo ya Mushilo yengawamyako imikalile yabo, “balafwaisha nga nshi ukubelenga Baibolo.”

Magazini wa U.S. Catholic alanda pali uku kwaluka ilyo ayambula amashiwi yalandilwe no mukalamba wa basambilisha ifya kwa Lesa uwatile baKatolika abailundile mwi bumba lya basambilila Baibolo basosele abati “balipuswilwe nga nshi muli buKatolika, no kuti muli Baibolo mwaliba ifintu ifisuma nga nshi. Balafwaya ukumwenamo fimo fimo ifisuma nga nshi ifyo balepusulwa.”

Nga kanshi “fisuma” nshi ifyo uulesambilila Baibolo engasanga? Tontonkanyeni pali fi: Bushe kuti mwatemwa ukwishiba ifya kucita na masakamika ya cila bushiku? Kuti mwasungilila shani umutende mu ng’anda mu mwenu? Mulandu nshi ukumalala no lupato fifulile fi? Cinshi cilelenga abacaice ba lelo ukuba no lukakaala? Ifyasuko fine fine kuli aya mepusho na mepusho yambi ayapelenganya kuti fyasangwa mu Cebo ca kwa Lesa, Baibolo, kabili kuti fyaletako “ifisuma” nga nshi kuli bonse baKatolika nelyo baProtestanti ukusanshako fye na baBuddha, abaHindu, abaShilamu, abaShinto, pamo pene na bamukanalesa na basumina ukuti Lesa te kuti tumwishibe. Kwati ni kemba wa malumbo uwatile, ‘Icebo ca kwa Lesa cali ni nyali ku makasa yakwe, kabili lubuuto ku nshila shakwe,’ e fyo fye cingaba na kuli imwe.—Amalumbo 119:105.