“Ukulasa kwa Cibusa”

UMUTUMWA Paulo amwene ukuti Abena Kristu ba mu mwanda wa myaka uwa kubalilapo aba mu Galatia balekabila ukufundwa. Napamo pa kukanabakalifya, aipwishe icipusho ca kuti: “E ico bushe nabo mulwani wenu, pa kumwebe cine?”—Abena Galatia 4:16.

Paulo tali mulwani wabo pa ‘kubeba icine.’ Na kuba, abombele mu kumfwana na mashiwi ya mu Baibolo ayatila: “Ukulasa kwa cibusa kwa cishinka.” (Amapinda 27:6, King James Version). Alishibe ukuti icilumba ca balufyenye kuti calaswa. Lelo, alishibe ukuti ukufilwa ukusalapula uulufyenye kuti kwapusula umo ukupokelela ukutemwa kwa kwa Yehova Lesa. (AbaHebere 12:5-7) E co, nga cibusa wa cishinka uwatwalilile ukutemwe cilonganino, pa kufunda Paulo talekwinda.

Pali lelo, Inte sha kwa Yehova balebomba umulimo wa ‘kulenga aba nko shonse ukuba abasambi, . . . ukubasambilisha ukubaka fyonse ifyo [Yesu Kristu] abebele.’ Mu kucite fyo, aba Bena Kristu bafumaluka tabasuusuka ku cine ca Baibolo icisansalika no kukaanya ifisambilisho fyalubana ne mibele ishili ya Bwina Kristu. (Mateo 15:9; 23:9; 28:19, 20; 1 Abena Korinti 6:9, 10) Ukucila ukuba nga balwani abashifwaikwa, aba Bena Kristu bafumaluka balangisha bucibusa bwa cine cine.

Pa kushilimunwa na Lesa, kemba wa malumbo alembele ukuti: “Uwalungama ang’ume ku luse, no kunjebaula, lelo amafuta ya babifi yekansuba ku mutwe; pantu ipepo lyandi lili pa milimo yabo ibi pe.”—Amalumbo 141:5.