Ifipusho Ukufuma ku Babelenga

Myaka Inga Yobo aculile?

Bamo batila Yobo aeshiwe pa myaka iingi, lelo ibuuku lya kwa Yobo talilanda ukuti aculile pa nshita yalepa ifyo.

Ubucushi bwa kubalilapo ubwa kwa Yobo, e kutila imfwa ya bana bakwe no kusendwa kwa fitekwa fyakwe, fifwile fyacitike fye mu nshita iinono. Tubelenga ukuti: “Nomba ubushiku bumo, ilyo abana [ba kwa Yobo] abaume na bana bakwe abanakashi balelya no kunwo mwangashi mu ng’ anda ya kwa munyinabo mukalamba.” Yobo apokelele inkombe shakonkene ukwisa ku kumweba amafya—ukusendwa kwa ng’ombe, ingamali, impaanga, impunda, kumo na babomfi bakwe abalelinda ifyo fitekwa. Cimoneka kwati lilya line e lintu Yobo abikwililwe ne mfwa ya bana bakwe abaume na bana banakashi, ‘abalelya no kunwo mwangashi mu ng’anda ya kwa munyinabo mukalamba.’ Ifi fyonse fifwile fyacitike fye ubushiku bumo.—Yobo 1:13-19.

Ubucushi bwakonkelepo ubwa kwa Yobo bufwile bwalikokweleko. Satana aile kuli Yehova no kutunga ukuti Yobo akafilwa nga ca kutila ukucula kwaba pa mubili wakwe wine. Lyene Yobo auminwe “ku fipute fyabipa ukufuma ku nyantilo ya lukasa lwakwe no kufika pa kati ka mutwe.” Pafwile palipitileko inshita pa kuti ubulwele bukumane umubili onse. Na kabili pafwile palipitileko inshita na imbi pa kuti abaleitunga ukuba bakasansamusha bakwe bomfwe “ubo bubi” no kwisa kuli wene.—Yobo 2:3-11.

Elifasi afumine ku Temani ku calo ca Edomu, Sofari ena afumine ku calo cabela pa kati ka kapinda ka kuso na masamba ya Arabia, kanshi ku mwabo takwali ukutali sana no kwaleikala Yobo ku Usi, pantu ku Usi nalimo kwali ni ku kabanga ka Arabia. Lelo, Bildadi aali mwina Shuhi, kabili caumfwika ukuti abantu bakwe baleikalila ku mumana wa Yufrate. Nga ca kutila Bildadi ali ku mwabo pali ilya nshita, ninshi pafwile palipitile imilungu nelyo imyeshi pa kuti omfwe ifyacitike kuli Yobo na pa kuti ende ukuya ku Usi. Lelo kwena, kuti caba no kuti balya batatu bali lwa mupepi na kuntu Yobo aleikala ilyo amacushi yakwe yatendeke. Te mulandu ne fyo caali, ilyo abanankwe ba kwa Yobo batatu bafikile, “baikele pa nshi uko ali inshiku cinelubali akasuba no bushiku; takwali no wa kusose cebo kuli wene.”—Yobo 2:12, 13.

Lyene kwaishile ifya kulekelesha ifyacitike mu kucula kwa kwa Yobo, ifyalandilwe pali iyi nshita e fyaba mu fipandwa ifingi ifye buuku lya kwa Yobo. Kwali ukupaashanya nelyo ukulandapo ku baleibepekesha ukusansamusha Yobo, na Yobo ilingi line alebaasuka. Pa kulekelesha, umulumendo Elihu alungike Yobo, na Yehova na o alungike Yobo ukulanda ukufuma mu muulu.—Yobo 32:1-6; 38:1; 40:1-6; 42:1.

E co, amacushi ya kwa Yobo no kupwa kwa yako fifwile fyacitike fye mu myeshi ya kupenda, nalimo no mwaka tawakumene. Nalimo mwalishiba ku fyamucitikilapo ukuti amafya ayakulu yamoneka kwati ya muyayaya. Nalyo line, tatufwile ukulaba ukuti yalapwa, nga filya fine aya kwa Yobo yapwile. Te mulandu ne nshita twacula, natuleibukisha ukuti Lesa alatutungilila, nga mulya mwine icebo caputwamo casosela aciti: “Pantu ubucushi ubwayanguka ubwa kashita akanononono, buletuteyanishe cintu ca bukata icapulishamo ica muyayaya.” (2 Abena Korinti 4:17) Umutumwa Petro alembele ukuti: “Lesa wa kusenamina konse, uwamwitile ku kwisa mu bukata bwakwe bwa muyayaya muli Kristu Yesu, ilyo mukacula inshita inono, wene akamulengo kuti mube abapwililila, akamwikasha, akamukosha.”—1 Petro 5:10.